Olmaota aeroportida ijtimoiy tajriba o‘tkazildi: xavfsizlik xizmati xodimlari yo‘lovchilarga ichiga to‘pponcha mulyaji va kukunli paket yashirilgan olmalar solingan qutini olib o‘tishni taklif qildi. Bu haqda “Informburo.kz” xabar bermoqda.
Fuqaro kiyimidagi aeroport xodimi bir soat davomida 12 nafar yo‘lovchiga murojaat qildi. 4 kishi bunga rozi bo‘ldi va qutini o‘zining yuki sifatida topshirdi.
Ko‘rikdan so‘ng ular yuk bo‘limiga taklif qilindi. Ko‘z o‘ngilarida ochilgan qutidan olmalardan tashqari kukun solingan shaffof paket va to‘pponcha topildi.
Joriy yil davomida Olmaota aeroportida yo‘lovchilardan keyinchalik taqiqlangan buyumlar topilgan yuk olib o‘tish so‘ralgan 15 ta holat qayd etildi. 2018-yilda bunday vaziyat uch marotaba ro‘y bergandi.
“O‘zgalarning yukini olib o‘tishga rozi bo‘lgan yo‘lovchilar huquqbuzarlar qatoridan joy olishi mumkin. Chunki yuk ichidan man etilgan buyumlar topilsa, buning uchun yo‘lovchi javobgar bo‘ladi”, — deyiladi xabarda.
Izoh (0)