Yoshlar ittifoqi yetakchisi qalbaki pullar ishlab chiqargani uchun qo‘lga olindi
Yoshlar ittifoqining qashqadaryolik xodimi qalbaki pul ishlab chiqarish bilan shug‘ullangani ma’lum bo‘ldi. Bu haqda “Daryo”ga Qashqadaryo viloyati IIB matbuot xizmati rahbari Iroda Rasulova xabar berdi.
Iroda Rasulovaning ma’lum qilishicha, qalbaki pul ishlab chiqarish holati viloyat IIBning Jinoyat qidiruv bo‘limi, Korrupsiya va iqtisodiy jinoyatlarga qarshi kurashish bo‘limi hamda Kasbi tuman IIB Jinoyat qidiruv bo‘limining tezkor vakillari tomonidan olib borilgan tadbirda ma’lum bo‘lgan.
Kasbi tumanining Qo‘riq qishlog‘ida yashovchi Yoshlar ittifoqining 24 yoshli xodimi A.B. “Mug‘lon” MFY hududidagi o‘zi ijraga olgan tikuvchilik sexida turli xil kupyuradagi qalbaki pullarni ishlab chiqargan.
Aytilishicha, A.B.dan olingan 172 dona 50 ming so‘mlik kupyuradagi 8 million 600 ming so‘m pul, rangli printerdan to‘liq chiqarilmagan 84 dona 50 ming so‘mlik kupyuradagi pullar, Epson rusumli rangli printer va Lenovo rusumli noutbuk tegishli tartibda hujjatlashtirib olingan.
A.B.dan olingan AB 0304117 seriya raqamli 172 dona 50 ming so‘mlik kupyura “Davlat belgilisi” korxonasida ishlab chiqarilmaganligi, rangli purkagichli printer yordamida tayyorlangani aniqlangan.
Kasbi tuman hokimligi matbuot xizmatining aniqlik kiritishicha, B.A. tumandagi 36-maktabda Yoshlar ittifoqi yetakchisi bo‘lib ishlagan.
Mazkur holat yuzasidan Kasbi tuman IIB tomonidan 19-noyabr kuni A.B.ga nisbatan jinoyat ishi qo‘zg‘atilib, tergov harakatlari olib borilmoqda.
