“Mozori Sharif—Toshkent” yo‘nalishida muntazam aviaqatnovlar yo‘lga qo‘yiladi

Mozori Sharif shahrida O‘zbekiston va Afg‘oniston Islom aviatsiya ma’muriyati o‘rtasida muzokaralar bo‘lib o‘tdi, deb xabar berdi O‘zA.

O‘zbekiston Transport vazirligi delegatsiyasini Afg‘oniston fuqaro aviatsiyasi boshqarmasining huquq va xalqaro shartnomalar departamenti direktori janob Halilulloh Abaviy qabul qildi.

Muzokaralar davomida aviatsiya qatnovlari sohasidagi ikki tomonlama munosabatlarning bugungi holati hamda kelgusida o‘zaro manfaatli hamkorlik istiqbollari haqida so‘z bordi.

Kun tartibidagi masalalar bo‘yicha konstruktiv fikr almashildi, shuningdek, Afg‘oniston va O‘zbekiston o‘rtasida parvozlarni ko‘paytirish hamda tayinlangan aviakompaniyalarning parvozlari geografiyasini kengaytirish masalalari muhokama etildi.

Muzokaralar yakuni bo‘yicha Mozori Sharif shahridan Toshkentga parvozlarni boshlash uchun tegishli kelishuvlarga erishildi.

Afg‘oniston tomoni “Kam Air” aviakompaniyasi tegishli tashkiliy-texnik tartibotlar yakuniga yetgandan so‘ng Mozori Sharifdan Toshkentga muntazam reyslarni amalga oshirish uchun tayyorligini bildirdi.