Uchta vazirlikda mehnatga haq to‘lashning yangi tizimini joriy etish taklif qilinmoqda

Prezident huzuridagi Davlat boshqaruvini rivojlantirish agentligi “Davlat fuqarolik xizmatini tashkil etish bo‘yicha qo‘shimcha chora-tadbirlar to‘g‘risida”gi Prezident qarori loyihasini muhokamaga qo‘ydi.

Qaror loyihasiga ko‘ra, 2020-yil 1-yanvardan boshlab davlat fuqarolik xizmati kiritilayotgan davlat organlari va tashkilotlarining lavozimlari va tarkibiy bo‘linmalarining nomlanishiga oid yagona talablarni belgilash taklif qilinmoqda. Ular ta’lim va ilmiy tadqiqot muassasalari, shuningdek, sog‘liqni saqlash muassasalari, madaniyat, ijod va san’at sohasidagi davlat tashkilotlariga tatbiq etilmaydi.

Shuningdek, 2020-yil 1-iyuldan boshlab adliya organi va sud hokimiyati xodimlari, davlat organlari va tashkilotlarining yuridik xizmatlari, shuningdek, davlat soliq xizmati maxsus unvonlarni (martaba darajalari) berish tartibini bekor qilish rejalashtirilmoqda.

2020-yil 1-yanvardan boshlab Moliya vazirligi, Bandlik va mehnat munosabatlari vazirligi hamda Adliya vazirligida quyidagi to‘lovlarni nazarda tutuvchi davlat fuqarolik xizmatchilari mehnatiga haq to‘lash tizimini joriy etish:

• Davlat xizmatchilari mehnatiga haq to‘lashning yagona tarif setkasiga muvofiq Davlat budjeti hisobidan to‘lanadigan bazaviy lavozim maoshi;
• Davlat xizmatchilarining maoshiga malaka darajalari uchun qo‘shimcha to‘lovlar miqdoriga muvofiq Davlat budjeti hisobidan to‘lanadigan malaka darajasi uchun qo‘shimcha to‘lovlar;
• ish beruvchi tomonidan belgilanadigan, tashkilotning budjetdan tashqari mablag‘lari hisobidan to‘lanadigan, lekin bazaviy lavozim maoshining 200 foizigacha bo‘lgan shaxsiy ustamalar. Davlat fuqarolik xizmatchilari mehnatiga haq to‘lash tizimining joriy etilishi natijalari tahlili asosida ushbu tizim davlat fuqarolik xizmati to‘g‘risidagi qonunchilik tatbiq etiladigan barcha davlat organlarida joriy etiladi.

Qaror loyihasida davlat fuqarolik xizmati to‘g‘risidagi qonunchilik tatbiq etiladigan barcha davlat organlari ro‘yxati tasdiqlanishi ko‘zda tutilgan. Ular milliy, respublika, hududiy va tuman darajalariga bo‘linadi.

Davlat fuqarolik xizmatiga ilk bor ishga kiruvchilarning qasamyod qabul qilishi kutilmoqda.

Hujjat muhokamasi 1-dekabrga qadar davom etadi.