Tashkent City xalqaro ishbilarmonlik markazi hududidagi savdo ko‘ngilochar markazi (SKM) O‘rta Osiyoda eng ulkanlari orasida: mintaqa aholisi uchun xizmat ko‘rsatish va mutaxassislar malakasining dunyo standartlariga moslashishi misolida.
Toshkentning e’tiborga loyiq maskanlaridan biri bo‘lishi rejalashtirilgan mazkur SKM, xaridorlar uchun ko‘plab qulayliklar yaratishi bilan birga, shahar hamda butun mamlakat ijtimoiy hayotida qator ijobiy o‘zgarishlar olib kelishi kutilmoqda.
So‘nggi yillardagi statistik ma’lumotlar, aholining xarid jarayoniga munosabatlari, asta sekinlik bilan bo‘lsa-da savdo majmualari tomon o‘zagarib borayotganligini ko‘rsatmoqda. Misol uchun, O‘zbekiston Respublikasi Davlat Statistika qo‘mitasi taqdim etgan ma’lumotlarga ko‘ra chakana savdo aylanmasi 2018-yilda 6,5% ga o‘sgan bo‘lsa, shundan buyum, oziq-ovqat hamda ixtisoslashgan bozorlardagi savdo tovar aylanmasi 2017-yilda faqat 1,4 % ga o‘sishi va so‘ng 3,6% ga pasayganini ko‘rish mumkin. Bu esa, yillar davomida O‘rta Osiyo xalqlari uchun an’anaviy bo‘lib qolgan savdo rastalari ma’lum o‘rnini savdo markazlariga bo‘shatib berayotganligini ko‘rsatadi. Xaridorlar uchun savdo majmualaridagi shinamlik, aniq narx va cheklar, sifatli xizmat va maslahatlar, yosh bolalar bilan savdo qilish imkoniyatlari va keng avoturargohlar qo‘shimcha qiymat sifatida taklif etilib, ularning ishonchi qozonilmoqda.
Albatta, ushbu tabiiy jarayonda Tashkent City Mall, bir necha raqobatbardosh ustunliklari evaziga, savdo markazlarining bozordagi o‘rnini yanada mustahkamlashini taxmin qilish mumkin. Avvalo, uning hajm jihatidan O‘rta Osiyodagi yetakchi o‘rinlardaligi evaziga, odamlar uchun tashrif buyurilishi shart bo‘lgan maskanlar qatoriga qo‘shilishi turgan gap. Ammo, “eng ulkan”, “eng hashamatli” iboralaridan uzoqlashib, mijozlar uchun real afzalliklar yaratilishini inobatga olsak quyidagi xulosaga kelishimiz mumkin.
Avvalo, transport borasida xaridorlar uchun Tashkent City Mall’ga, shahrimizning istalgan qismidan uzog‘i 30 daqiqada yetib kelish imkoni mavjud – 4 ta avtobus, 4 ta marshrutli taksi hamda yer osti yo‘li ushbu vazifani mukammal amalga oshirish uchun xizmat qiladi.
Tarix (arxitekturaviy shakllar), bugun (tabiat) va kelajakni (yuqori texnologiyalar) aks ettiruvchi 3 ta atriumga ajratilgan majmuada O‘zbekiston uchun asosan ilk bor kirib kelayotgan mashhur brend do‘konlari ochiladi.
Barcha turdagi kiyim-kechak, elektronika, o‘yinchoqlar, uy jihozlari do‘konlari qatorida bolalar uchun ulkan o‘yingoh, 9 ta zalli kinoteatr, fitness va sport maskanlari, tezkor va sekin tayyorlanadigan ovqatlanish muassasalari (fast food & slow food), ko‘rgazma va tadbir hududlari o‘rin oladi.
Tashrif buyuruvchilar uchun xizmat ko‘rsatilishini yuqori standartlarga olib chiqish uchun 2500 avtomobil uchun mo‘ljallangan ulkan, 2-qavatli avtoturargohning joylashishi ko‘zda tutilgan.
Tashkent City Mall’ning ijtimoiy ahamiyati haqida so‘z borganda, uning to‘liq ishga tushirilishi aholiga xizmat ko‘rsatishni yanada yuqori pog‘onaga olib chiqishi, markazda savdo hamda xizmat ko‘rsatish sohasidagi band aholining ish malakasi xalqaro standartlarga moslashishiga olib keladi. Umumiy 2000 ta ish o‘rni yaratilishi rejalashtirilgan savdo markazida, mahalliy aholi uchun jahon brendlari misolida savdo, marketing, logistika, brending, mehnat resurslari, yetkazib berish zanjirlarini boshqarish va hokazo kabi sohalardagi bilim va ko‘nikmalarni o‘stirish sharoiti yaratiladi.
Toshkent infratuzilmasida yuksak rivojlanishni aks etayotgan Tashkent City Mall, turizm uchun ham jalb qiluvchi omil vazifasini bajaradi. Loyihaning qulay jihati, u nafaqat mamlakat aholisi, balki Shimkent, Xo‘jand va boshqa qator qo‘shni mamlakat shaharlari uchun ham oldi-sotdi jarayonlarini amalga oshirish imkonini yaratadi.
Shubhasiz, mazkur majmua davlatimiz ravnaqidagi sezilarli qadam bo‘lmoqda, bu esa unga xalqaro xizmat ko‘rsatish trendlariga to‘liq javob berish vazifasini yuklaydi. Shu sababli, savdo ko‘ngilochar markazning barpo etilishida qabul qilingan parallel loyihalash evaziga, qurilish dasturi hamda texnologiyalari barqaror rivojlantirib boriladi.
Xulosa qilib shuni aytish mumkinki, loyihaning eng asosiy xususiyatlaridan biri tariqasida, uning katta o‘lchamlari evaziga xalqning turli tuman didlariga, qarashlariga va savdo qobiliyatiga mos takliflar to‘plamini o‘zida jamlash va ularga yuqori sifatli xizmat ko‘rsatishi kabilar rejalashtirilgan.
Reklama huquqi asosida.
Izoh (0)