O‘zbekiston va Rossiya o‘rtasidagi savdo aylanmasi 2019-yilda 7 mlrd dollardan oshishi mumkin
O‘zbekiston va Rossiya 2019-yil yakunlariga ko‘ra o‘zaro savdo aylanmasini 7 milliard dollardan oshirishi mumkin. Bu haqda Qozondagi O‘zbekiston bosh konsuli Fariddin Nasriyevga tayanib, TASS xabar berdi.
Qayd etilishicha, 2018-yil yakunlariga ko‘ra ikkala mamlakat o‘rtasidagi savdo aylanmasi 20 foizga o‘sib, qariyb 6 milliard dollarni tashkil qilgan. Joriy yilning dastlabki yetti oyida bu ko‘rsatkich 15 foizga o‘sgan.
“Bizga yaqin yillarda Rossiya bilan savdo aylanmasi hajmini 10 milliard dollarga yetkazish vazifasi yuklatilgan. Joriy yilda 6 milliard dollardan ko‘proq va ehtimol 7 milliard dollardan oshiqroq natijalarga erishamiz. Bu borada mintaqalararo hamkorlik muhim ahamiyatga ega”, — degan Fariddin Nasriyev.
Uning aytishicha, O‘zbekiston Tatariston bilan savdo hajmini oshirish va yangi loyihalarni ishlab chiqish niyatida. Samarali hamkorlik namunasi sifatida bir nechta yonilg‘i quyish shoxobchalarini ochgan O‘zbekistondagi “Tatneft” kompaniyasini aytgan. Shuningdek, u respublikadagi neft konlaridan biri ishlarida rahbarlik qiladi. Toshkent atrofidagi konlar “Tatneft” tomonidan o‘zlashtiriladi, deya qo‘shimcha qilgan bosh konsul.
Diplomatning ta’kidlashicha, O‘zbekiston tashqi iqtisodiy aloqalarni rivojlantirish xalqaro faoliyatning ustuvor yo‘nalishlaridan biridir. O‘zbekiston Rossiya mintaqalari bilan savdo-iqtisodiy, sarmoyaviy va madaniy hamkorlikni kengaytirishdan manfaatdor. Buning uchun Rossiyada qo‘shimcha konsullik idoralari ochilgan.
“Ikki yil davomida biz Vladivostokda, Yekaterinburgda, Rostovda, Qozonda, Sankt-Peterburgda konsullik idoralarini ochdik, bundan oldin bizning konsulligimiz yo‘q edi, faqat Moskvada elchixonamiz, shuningdek, Novosibirskda konsulxonamiz bor edi.
Rossiya Federatsiyasi hududi juda katta va bizning “Fuqarolarga bir nuqtadan ikkinchisiga o‘tish juda qiyin edi. Qulay shart-sharoitlar yaratish uchun biz konsulliklar ochdik, yordam ko‘rsatdik va bu ikki mamlakat mintaqalari o‘rtasidagi munosabatlarni rivojlantirishga turtki beradi”, — degan Nasriyev.
