11-noyabr kuni Bryussel shahrida bo‘lib turgan O‘zbekiston tashqi ishlar vaziri Abdulaziz Komilov va Yevropa komissiyasining Xalqaro hamkorlik va taraqqiyot bo‘yicha bosh direktori Koen Doens “O‘zbekistonning Jahon savdo tashkilotiga kirishi” va “Orolbo‘yi mintaqasi uchun Inson xavfsizligi bo‘yicha ko‘p sheriklik trast fondiga Yevropa Ittifoqining taraqqiyot hissasi” texnik yordam loyihalarini moliyalashtirish to‘g‘risida bitimlarni imzoladi, deb xabar berdi TIV matbuot xizmati.
Respublikaning JSTga qo‘shilishi uchun ajratiladigan grant mablag‘lari hajmi 5 million yevroni tashkil etadi. Loyiha ushbu tashkilotga a’zo bo‘lish jarayonida, shu jumladan, zarur hujjatlarni tayyorlash, o‘zbekistonlik mutaxassislarning JST kelishuvlari va xalqaro savdo tizimiga oid bilimlarini oshirishda O‘zbekistonga ko‘maklashishni nazarda tutadi.
Ko‘p sheriklik trast fondi loyihasi bo‘yicha ajratilgan mablag‘lar (5,2 million yevro) fondning Orol dengizi mintaqasidagi loyihalarini amalga oshirishga yo‘naltiriladi.
Izoh (0)