Avvalroq ijtimoiy tarmoqlarda “01 001 VIP” davlat raqam belgisi bilan bog‘liq videotasvir tarqalgani haqida xabar berilgandi. “Zamon” informatsion dasturida ma’lum qilinishicha, Toshkent shahar IIBB ushbu raqamlarni yasagan fuqaroni qo‘lga olgan.
Videoni tasvirga olgan fuqaro boshqalarga ham shu turdagi soxta raqamlar yasab berishni taklif qilgan.
Ta’kidlanishicha, internet orqali fuqarolar buyurtmalar berishni ham boshlagan, xususan, bir fuqaro “01 707” davlat raqamini yasatish uchun buyurtma bergan. Xizmat ko‘rsatuvchi mazkur raqamlarni yasagani uchun 150 AQSh dollari miqdorida pul olayotganida Toshkent shahar IIBB Jinoyat qidiruv boshqarmasi tomonidan ushlagan.
Soxta raqamlarni yasash bilan shug‘ullangan fuqaro — 1987-yili Toshkent shahrida tug‘ilgan Akmal Masharipov bo‘lib chiqqan.
“Internetda chiroyli nomerlarni qarab o‘tirganimda mana shunaqa nomer ko‘rib qoldim. Moskvada talabaman. U yerda mana shunday nomerlar chiqarib beradigan poligrafiyalar borligini ko‘rgandim. Internet orqali ularga buyurtma berdim. O‘rtoqlarimga maqtanaman deb shu raqamlarni keltirdim. Internetga qo‘yganimda keyin ko‘pchilik yoza boshladi. Bunaqa nomerlar radarga tushish-tushmasligini so‘ray boshlashdi. Men bu haqda bilmasligimni aytdim”, — deydi Akmal Masharipov.
Hozirda mazkur holat yuzasidan surishtiruv ishlari olib borilmoqda.
Qayd etilishicha, O‘zbekiston Respublikasi Ma’muriy javobgarlik to‘g‘risidagi kodeksining 125-moddasi 6-qismiga asosan Davlat raqam belgisi yasama yoki o‘zga usullarda o‘zgartirilgan transport vositalarini, shuningdek, davlat raqam belgisi ayni shu transport vositasiga tegishli bo‘lmagan transport vositasini boshqarish — bazaviy hisoblash miqdorining o‘n baravari miqdorida jarima solishga sabab bo‘ladi.
Izoh (0)