Qashqadaryo viloyati sog‘liqni saqlash boshqarmasi axborot xizmati tomonidan ma’lum qilinishicha, viloyat ko‘z kasalliklari shifoxonasiga Chiroqchi tumani Beshchashma mahalla fuqarolar yig‘inida yashovchi 103 yoshli Jumagul momo Eshnazarova ko‘zlari xiralashganidan shikoyat qilib murojaat qilgan.
Jumagul momo shifoxonada to‘liq tekshiruvdan o‘tkazilib, unga asoratli katarakta tashxisi qo‘yildi. Olti kunlik ambulator davolash tadbirlaridan so‘ng momoning ko‘zlari ravshanlashgan. Shifokorlarning qayd etishicha, 103 yoshda bunday holat hayratlanarli hodisa hisoblanadi.
Shifokorlar tomonidan ma’lum qilinishicha, mutaxassislar bilan maslahatlashib, kelgusida shifoxonaga keltirilgan zamonaviy fakoemulsifikator uskunasi yordamida momoning ko‘zlariga sun’iy gavhar qo‘yish rejalashtirilmoqda.
Yoshligida Katta Farg‘ona kanalini bunyod etishda ishtirok etgan Jumagul momo hali tetik va bardam. Momo shifokorlarga chin dildan minnatdorlik bildirib, kasb bayrami bilan tabrikladi, deyiladi boshqarma xabarida.
Izoh (0)