Turkiya prezidenti Rajab Toyyib Erdo‘g‘onning rasmiy vakili Ibrohim Kalin joriy yilning 3—4-dekabr kunlari Suriyadagi vaziyat muhokamasiga bag‘ishlangan Turkiya—Germaniya—Fransiya sammiti 3–4-dekabr kunlari o‘tkazilishini ma’lum qildi, deb yozmoqda “TASS”.
Erdo‘g‘on vakilining so‘zlariga ko‘ra uchrashuv Londonda o‘tkaziladi. Buyuk Britaniya poytaxti dekabrda NATO sammitiga ham mezbonlik qiladi.
Mavzuga doir:
9-oktabrda Anqara Suriya shimoli-sharqida Turkiyadagi qochoqlar uchun xavfsiz zona tashkil etish maqsadida “Suriya demokratik kuchlari” kurd jangarilari va IShID terrorchilariga qarshi “Tinchlik bulog‘i” harbiy operatsiyasini boshlagan. Dunyo davlatlari turklarning ushbu harakatlarini qoralagan. Germaniya federativ respublikasi kansleri Angela Merkel 14-oktabrda Turkiya prezidenti Rajab Toyyib Erdo‘g‘on bilan telefon orqali qilgan muloqot chog‘ida undan Suriya shimoli-sharqidagi harbiy harakatlarni to‘xtatishni so‘ragan, Turkiya davlat rahbari esa bunga javoban kanslerga turklar yoki kurdlardan birini tanlashni tavsiya qilgan. Keyinchalik Germaniya, Fransiya va Kanada Turkiyaga qurol sotishni to‘xtatdi.
17-oktabrda Anqara va Vashington Suriya shimoli-sharqidagi operatsiyani 120 soatga, kurdlar xavfsiz zona hududidan chiqib ketishi uchun to‘xtatishni kelishib oldi. Germaniya Turkiyaning Suriyadagi harbiy harakatlarni to‘xtatgani uchun qo‘llab-quvvatladi.
19-oktabrda Fransiya Milliy majlisining (parlament quyi palatasi) 8 fraksiyasidagi 60 nafar deputati Turkiyani NATO a’zoligidan chiqarishni va Anqaraga nisbatan sanksiyalar qo‘llashni taklif qildi. 21-oktabrda Turkiya prezidenti Rajab Toyyib Erdo‘g‘on Rossiyaga jo‘nab ketishi oldidan jurnalistlar bilan suhbat chog‘ida Eron hamda Fransiyaga Suriya shimoli-sharqidagi harbiy operatsiyalar sabab Anqarani tanqid qilganlari uchun javob qaytardi. 22-oktabrda Sochida Rossiya prezidenti Vladimir Putin va Turiya davlat rahbari Rajab Toyyib Erdo‘g‘on Suriya hududidagi notinch vaziyatni muhokama qildi va “Tinchlik bulog‘i” operatsiyasini 23-oktabrdan yana 150 soatga to‘xtatish va o‘t ochmaslik haqidagi shartlashuv muddati yakuniga yetgach hamkorlikda Turkiya—Suriya chegarasida 30 kilometrlik hududni barpo etish uchun qo‘shma patrul tadbirlari o‘tkazish haqida memorandum imzoladi. Memorandumda Bashar Asad hukumatining qo‘shinlari Turkiya bilan chegara hududida 15 ta post o‘rnatishi belgilab qo‘yilgan.
1-noyabrda kurdlarning Turkiya chegarasidan 30 kilometr uzoqlikka chekingani va ular tark etgan hududni Sochida imzolangan memorandumga muvofiq Suriya qo‘shinlari va Rossiya harbiy politsiyasi egallashi ma’lum bo‘ldi. 5-noyabrda Turkiya hamda Rossiya harbiylari Suriya shimolidagi Ayn-al-Arab aholi punktidagi (Kobani) ikkinchi qo‘shma patrul tadbirlarini boshladi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)