Xalq ta’limi vazirligi ijtimoiy tarmoqlarda Navoiy viloyatining Karmana tumanida ta’til paytida maktab o‘qituvchilarini paxta terimiga jalb etilgani haqida tarqalgan xabarlarga munosabat bildirdi.
Ta’kidlanishicha, hozirda vazirlikning Huquqiy-nazorat xizmati hamda Navoiy viloyati xalq ta’limi boshqarmasi mazkur holatni o‘rganmoqda.
“Xalq ta’limi vazirligi bu kabi holatlarning oldini olish va tizim xodimlari huquqlarini himoya qilish maqsadida shikoyatlarni qabul qilishda qulay bo‘lgan virtual inspektorni ishga tushirgan. Tizimdagi xodimlar majburiy mehnatga jalb etilganida, huquqlari buzilganida yoki turli to‘lovlarga majburlangan holatlarda ovoz.uzedu.uz sayti yoki +998 (99) 988-10-06 telefoni va Telegram raqamiga murojaatlarini yuborishlari mumkin”, — deyiladi xabarda.
Eslatib o‘tamiz, O‘zbekiston Prezidentining “Yoshlarni ma’naviy-axloqiy va jismoniy barkamol etib tarbiyalash, ularga ta’lim-tarbiya berish tizimini sifat jihatidan yangi bosqichga ko‘tarish chora-tadbirlari to‘g‘risida”gi qaroriga ko‘ra, xalq ta’limi xodimlarini xizmat majburiyati bilan bog‘liq bo‘lmagan ishlarga, majburiy mehnatga, shu jumladan, tuman va shaharlar hududlarini obodonlashtirish hamda ko‘kalamzorlashtirish, mavsumiy qishloq xo‘jaligi hamda boshqa turdagi ishlarga jalb qilish taqiqlanadi.
Mavzuga doir: Qashqadaryoda Damas haydovchilarining hujjati olib qo‘yilib, paxtaga odam tashishga majbur qilingani aytilmoqda
Izoh (0)