Tailandning Yala viloyatida joylashgan nazorat-o‘tkazish punktiga qurolli hujum uyushtirilishi va otishma oqibatida 15 nafar odam halok bo‘ldi, to‘rt nafar fuqaro turli darajadagi tan jarohatlari oldi. Bu haqda “Interfaks” xabar berdi.
“Katta ehtimol bilan bu jangarilar tomonidan uyushtirilgan hujum. Bu oxirgi vaqtlarda kuzatilgan eng katta hujum bo‘ldi”, — deya ta’kildlagan viloyat xavfsizlik xizmati vakili.
Xabarga ko‘ra, hujum uyushtirganlar ta’qibdan qochish uchun portlovchi qurilmalardan foydalangan va mashina yo‘liga mixlar uloqtirgan.
Yala – Tailanddagi to‘rt viloyatning biri va u yerda yashovchi aholining asosiy qismi musulmonlar. 1909-yilgacha Yala, Pattani va Naratxivat viloyatlari Malay musulmon sultonligining hududiy qismlari hisoblangan.
Deep South Watch tashkiloti bergan ma’lumot bo‘yicha, hujumni 2004-yilda uch viloyatda ko‘tarilgan qo‘zg‘alon asorati deb baholash mumkin. Xalq isyonida 7 ming nafarga yaqin odam halok bo‘lgan.
Izoh (0)