Joriy yilning 5-noyabr kuni “O‘zeltexsanoat” uyushmasi bilan hamkorlikda “Kooperatsiya kuni” ko‘rgazmasi o‘tkazildi. Ko‘rgazma “O‘zeltexsanoat” tashabbusi bilan uyushtirildi va Artel Rohat ishlab chiqarish bazasida o‘tkazildi.

“Kooperatsiya kuni” ko‘rgazmasining asosiy maqsadi kabel va sim, maishiy texnika va elektrotexnika kabi sohalarda mahsulot ishlab chiqaruvchi korxonalarni bilrashtirgan holda kooperatsiya tuzish va mahalliy xomashyo va ehtiyot qismlardan samarali foydalanib, ishlab chiqarishni mahalliylashtirishdir. Ko‘rgazmada Artel, CP AO “Andijon kabel”, AO “Foton”, AO “Chirchiq transformator zavod”, OOO «Qo‘qon tex invest», OOO “Elxolding” kabi korxonalar ishtirok etdi.

“Kooperatsiya kuni” ko‘rgazmasida Artel kompaniyasi va boshqa qatnashchi korxonalar tomonidan yaratilgan ehtiyot qismlar taqdim etildi. Ko‘rgazma qatnashchilari bir-biri bilan qanday mahsulot ishlab chiqarishi haqida ma’lumot almashishi va hamkorlikda mahsulot ishlab chiqarish uchun kooperatsiya tuzish masalasini muhokama qilish uchun keng imkoniyatlar yaratildi.

Ko‘rgazmada muhokama qilingan mavzular O‘zbekiston Respublikasi Prezidenti Shavkat Mirziyoyevning joriy yilning 1-maydagi “Sanoat kooperatsiyasini yanada rivojlantirish va talab yuqori bo‘lgan mahsulotlarni ishlab chiqarishni kengaytirish chora-tadbirlari to‘g‘risida”gi qarorini amalga oshirilishiga o‘z hissasini qo‘shadi. Sanoat kooperatsiyasi tuzilishi O‘zbekiston Respublikasi iqtisodini rivojlantirishda hamda muhim reformalar kiritishda va chet el davlatlari mahsulotlari bilan bemalol raqobatlasha oladigan yuqori sifatli mahsulot ishlab chiqarishni yo‘lga qo‘yishda muhim rol o‘ynaydi desak, hech mubolag‘a bo‘lmaydi.

Ushbu qarorning samarali amalga oshirilishi nafaqat mamlakat ichki, balki tashqi iqtisodiyotini ham jadal rivojlanishiga hissa qo‘shadi. Bundan tashqari, ushbu loyihaning amalga oshirilishi yangi ishlab chiqarish bazalarining paydo bo‘lishi va yangi ish joylarining joriy etilishiga olib keladi.

“Kooperatsiya kuni” ko‘rgazmasida qatnashgan korxonalar mahalliy mahsulotlarni faol ishlab chiqarishni yo‘lga qo‘yish va yurtimiz eksport salohiyatini faol rivojlantirish kabi vazifalarni bajarishni o‘zlariga maqsad qilib qo‘ygan.

Mahalliy va xorijiy bozorlarda talab yuqori bo‘lgan mahsulotlar ishlab chiqarish uchun sanoatda kooperatsiya aloqalarini rivojlantirish esa xo‘jalik yurituvchi subyektlar o‘rtasida o‘zaro hamkorlik uchun qulay shart-sharoitlar yaratadi va mamlakatimiz iqtisodiyotini jadal rivojlanishiga turtki bo‘ladi.

Reklama huquqi asosida.