“O‘zbekkino” milliy agentligida davlat buyurtmasi asosida suratga olingan filmlarning davlat va nodavlat telekanallarda namoyishi masalalariga bag‘ishlangan Badiiy kengash yig‘ilishi bo‘lib o‘tdi. Yig‘ilishda “Daryo” muxbiri Feruz Muhammad ham ishtirok etdi.

Foto: “Kino san’ati”

Rejissor Zulfiqor Musoqov 29 yildan buyon filmlari davlat telekanallarida namoyish qilinishi va filmlarining muhim epizodlari asossiz va kulgili sabablar bilan kesilayotgani haqida gapirdi.

Yaxshimi, yomonmi 29  yil mobaynida hamma kanallarda filmlarim ko‘rsatilgan. Bunga xursand bo‘lish kerak, lekin to‘la xursand bo‘lmaganman. Chunki badiiy kengashda ‘O‘zbekkino’ tomonidan tasdiqlangan, davlatni mulki hisoblangan filmlarni qo‘pol ravishda kesib berishdi. Ba’zi bir joylarda butun bir epizodni kesishdi. Birorta ‘kesilmagan’ filmim yo‘q. Hatto ‘Vatan’ filmi ham kesib berildi.

Mana yaqindagina ochilgan ‘O‘zbekiston tarixi’ kanalida kesib berildi, jonim chiqib ketdi. ‘Berlin—Oqqo‘rg‘on’ filmi mazmunini yo‘qotdi. Sevishganlar qizil matoni ostida, birinchi bo‘sa olayotgan joyini shunday olib qirqib tashlashgan. Haligi kichkina bola kirayotganda qizil nemis bayrog‘ini kesib tashlashdi. Keyin tog‘asi chavaqlanib yotgan joyini ko‘rsatmagan, qaysi ahmoq qilgan?! Eski bir tanishim telefon qilib, ‘mening nomimni aytmang, bu tepadan chiqqan buyruq’ dedi. Nimaga? Hozir sababini bilsanglar, yiqilib tushasizlar. Emishki, nemislar bayrog‘i kattaligi bo‘yicha bizning ‘Xalqlar do‘stligi’ oldidagi bayroqdan ham katta bo‘lib qolgan emish. Bu qanaqa ahmoqgarchilik?! Men oldin ham uchrashganman, Xo‘jayev degan odam. Nima qilyapti desam, ularni gapi, ‘Qo‘limda 3000 ta odam bor, ahmoqlar bor’ deydi. ‘Yo‘q, kechirib qo‘yibsiz, efirga siz javob berasiz’ dedim. Qattiq gaplashganman. Otabek yonimda turgan edi o‘shanda.

Lekin bu yerda bitta masala bor. Bizning bevosita rahbariyatimiz, 30 yil mobaynida qaysi boshliqqa aytmay, ‘qo‘ysang-chi, televideniye bilan aloqamiz yomon, televideniye bilan urushib qolganmiz, ular bilan qandaydir ‘dagovorimiz’ bor, 30 sekundlik reklamani berishimiz kerak’ deyishadi. Men aytdimki, bozormi bu? Ular boshqa davlatda yashaydimi, ularning bunday qilishga nima haqqi bor ?

Zulfiqor Musoqov, O‘zbekiston san’at arbobi, kinorejissor