Suriyaning Tell-Obod shahridagi portlashda 19 nafar aholi vakili halok bo‘ldi

Suriyaning Turkiya bilan shimoliy chegara hududi yaqinidagi Tell-Obod shahrida portlash ro‘y berishi oqibatida 19 nafar tinch aholi vakili halok bo‘ldi, 29 nafar odam turli darajadagi tan jarohatlari oldi. Bu haqda “RIA Novosti” xabar berdi.

Xabarga ko‘ra, portlash minalashtirilgan avtomobildagi bombaning harakatga keltirilishi natijasida amalga oshgan.

Avval Anadolu axborot agentligi portlash natijasida kamida o‘n kishininga halok bo‘lganini xabar qilgandi.

“Suriya shimoli-sharqidagi Tell-Obod shahri markazidagi bozor hududida minalashtirilgan mashinaning portlashi natijasida 19 nafar odam qurbon bo‘ldi, 29 nafar aholi vakillari esa turli darjadagi tan jarohatlarini olgan” – deya ta’kidlagan “RIA Novosti”ga intervyu bergan hukumat vakili.

Suriya shimoli-sharqidagi Turkiya bilan chegara hududida 9-oktabrda Anqara tomonidan kurdlarga qarshi “Tinchlik bulog‘i” harbiy operatsiyasi boshlangan. Rajab Toyyib Erdo‘g‘onning ushbu harbiy harakatlardan ko‘zlagan maqsadi “Suriya demokratik kuchlari”, IShID hamda “Kurdiston ishchi partiyasi” jangarilarini ushbu hududdan siqib chiqarib, qochoqlar uchun maxsus “xavfsiz zona” yaratishdan iborat. Turkiyaning ushbu harakatlarini dunyo mamlakatlari keskin qoralagan. AQSh Anqaraga qarshi sanksiyalar qo‘llagan. Germaniya, Fransiya va Kanada qurol-yarog‘ sotishni to‘xtatgan.

17-oktabrda Turkiya prezidenti Rajab Toyyib Erdo‘g‘on va AQSh vitse-prezidenti Mayk Pens o‘rtasidagi muzokaralardan keyin “Tinchlik bulog‘i” operatsiyasi kurdlar “xavfsiz zona” hududini tark etishi uchun 120 soatga to‘tatildi. AQSh esa Anqaraga nisbatan qo‘llanilgan sanksiyalarni bekor qildi.22-oktabrda Rossiya prezidenti Vladimir Putin hamda Turkiya davlat rahbari Rajab Toyyib Erdo‘g‘on Sochi shahrida Suriyadagi vaziyatni muhokama qildi va olti yarim soat davom etgan suhbatdan keyin “Tinchlik bulog‘i”ni yana 150 soatga to‘xtatish va qochoqlar uchun “xavfsiz zona” hududida qo‘shma patrul tadbirlari o‘tkazish yuzasidan memorandum imzoladi. Eron ushbu memorandumni qo‘llab-quvvatlagan, AQSh esa Turkiyani bu yo‘nalishda Rossiya bilan emas NATO bilan hamkorlik qilishga chaqirgan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.