Samarqand shahri 3-noyabr kuni O‘zbekistonda ilk marta o‘tkazilayotgan Xalqaro xayriya yarim marafoniga mezbonlik qiladi.
“Daryo” muxbirining voqea joyidan xabar berishicha, yarim marafon yo‘lagi Samarqand shahrining markaziy ko‘chalaridan o‘tadi. Yugurishga Registon maydoni yonida start berilib, finishi chizig‘i ham xuddi shu yerdan kesib o‘tiladi.
Yugurishning yo‘nalishi bo‘yicha ishtirokchilar Mirzo Ulug‘bek madrasasi, “Sherdor” madrasasi, “Tillakori” madrasasi, “Ruhobod” maqbarasi, “Go‘ri Amir” maqbarasi, “Afrosiyob” shaharchasi, “Hazrati Xizr” maqbarasi, “Xo‘ja Doniyor” maqbarasi, Mirzo Ulug‘bek rasadxonasi, Shohi-Zinda ansambli, Siyob bozori, Bibi Xonim masjidlari yonidan o‘tadi.
Yo‘nalish Xalqaro marafonlar va yugurishlar assotsiatsiyasi (AIMS) tomonidan tasdiqlangan.
21,1 kilometr yo‘nalishining o‘lchab chiqilishi AIMS’ning sertifikatlangan o‘lchagichi yordamida amalga oshiriladi.
Musobaqada 12 yoshdan boshlab 2 kilometrgacha, 16 yoshdan boshlab 10 kilometrgacha va 18 yoshdan boshlab 21 kilometrgacha ishtirokchilar qatnashadi. Nizomda Samarqanddagi musobaqaning barcha qoidalarini topish mumkin.
Yarim marafondan tushgan mablag‘lar Toshkent teatrlaridan birida ko‘rish qobiliyati zaif va ko‘zi ojiz insonlar uchun qulay muhit yaratish bo‘yicha eksperimental loyihani amalga oshirishga yo‘naltiriladi. Ushbu dastur tifloizohlash (audiodeskripsiya) yordamida pyesani teatr sahnasida namoyish etilishini o‘z ichiga oladi.
Izoh (0)