Toshkent viloyati IIBB Yo‘l harakati xavfsizligi boshqarmasi xodimlari tomonidan viloyat hududida sodir bo‘lishi mumkin bo‘lgan yo‘l transport hodisalarining oldini olish maqsadida joriy yilning o‘tgan davri mobaynida avtomobil yo‘llarida ma’muriy huquqbuzarlik sodir etgan fuqarolarga 365 mingdan ortiq jarima belgilandi. Bu haqda viloyat IIBB YHXB matbuot xizmati “Daryo”ga ma’lum qildi.
Hozirgi kunga kelib, ushbu belgilangan jarimalarning 268 mingdan ortig‘i undirildi. Belgilangan jarimalarning 32 mingdan ziyodi jarima to‘g‘risidagi qaror chiqarilganiga 60 kun bo‘lganligiga qaramasdan, ular o‘z vaqtida to‘lanmagan.
Ushbu sodir etgan ma’muriy huquqbuzarlik uchun belgilangan jarimalarni o‘z vaqtida to‘lamagan haydovchilardan O‘zbekiston Respublikasi Ma’muriy javobgarlik to‘g‘risidagi kodeksning 3-moddasi, ya’ni ayb uchun javobgarlikning muqarrarligi prinsipiga asosan jarimalarni undirish choralari ko‘rilmoqda.
Toshkent viloyatining xalqaro va davlat ahamiyatiga ega bo‘lgan avtomobil yo‘llarida Majburiy ijro byurosining hududiy bo‘limlari xodimlari bilan hamkorlikda maxsus reyd tashkil etilgan. Reydlar davomida 8 ta Auto Con moslamasi yordamida qarzdor haydovchilar aniqlanib, shu joyning o‘zida tashkil etilgan “Sayyor kassa”lar yordamida jarimalar undirib olinmoqda.
Shuningdek, jarimalarni joyida to‘lay olmagan haydovchilarning transport vositalari ma’muriy javobgarlik to‘g‘risidagi kodeksning 291-moddasi talablari asosida jarima undirilgunga qadar jarima maydonlariga joylashtirilmoqda.
Izoh (0)