Rossiyaning 10 ta (ulardan 8 tasi atom) suv osti kemasi Shimoliy Atlantikadagi operatsiyaga safarbar etildi. Bu haqda harbiy razvedka manbalariga tayanib, Norvegiyaning NRK teleradiokompaniyasi ma’lum qildi, deya xabar beradi “Interfaks”.
Ko‘zda tutilgan maqsad NATO mudofaa sarhadlarini yorib o‘tish va AQShning sharqiy qirg‘oqlariga yashirincha yaqinlashishni mashq qilishdan iborat ekanligi aytilmoqda.
“Bu mashg‘ulotlar emas, balki Rossiya suv osti kemalarining AQSh sharqiy qirg‘oqlariga tahdid qilishga qodir ekanliklarini namoyish etishga qaratilgan yirik operatsiyasi. Ular oldiga payqalmagan holda Atlantikada imkon boricha uzoqroqqa suzib borish vazifasi qo‘yilgan”, — deya ta’kidlagan manba.
Qayd etilishicha, Rossiya suv osti kemalari NATO kemalarga qarshi mudofaasining Shimoliy Atlantikada Grenlandiya, Islandiya va Buyuk Britaniya o‘rtasidagi chizig‘ini kesib o‘tish va Atlantika eng olis hududlariga yetib borishga urinmoqda.
“Rossiya AQShga yaqinlashishga qodir ekanligini ko‘rsatmoqchi. Ruslar G‘arbning ularni payqash imkoniyati va bunga qanday munosabatda bo‘lishini sinab ko‘rish niyatida”, — xulosa qilgan Norvegiya razvedkasi vakillari.
Rossiya suv osti kemalarining 60 kunga mo‘ljallangan operatsiyasi Barens va Norvegiya dengizlarida o‘tgan hafta avvalida boshlangani bildirilgan.
Izoh (0)