Qozog‘iston prezidenti Qosim-Jo‘mart To‘qayev Moskva davlat xalqaro munosabatlar universiteti haqida tayyorlangan teledasturda oliy o‘quv yurtining uning keyingi hayot yo‘lini belgilab olishida muhim o‘rin egallaganini qayd etdi, deb yozmoqda “Zakon.kz”.

Rossiya telekanallaridan birida efirga berilgan ko‘rsatuvda Moskva davlat xalqaro munosabatlar universitetining tarixi haqida hikoya qilingan. Ushbu oliy o‘quv muassasining eng mashur bitiruvchilari orasida To‘qayevdan tashqari Rossiya tashqi ishlar vaziri Sergey Lavrov, Rossiyadagi o‘zbek milliarderi Alisher Usmonov ham bor.

Qozog‘iston prezidenti intervyusida universitet uning o‘z hayot yo‘lini tanlab olishiga sababchi bo‘lganligini ta’kidladi.

Agar men ushbu universitetni tamomlamaganimda siyosiy faoliyat bilan shug‘ullanmagan bo‘lardim. BMT bosh kotibining o‘rinbosari bo‘lishni esa faqat orzu qilish mumkin edi. Shu sababli Moskva davlat xalqaro munosabatlar universiteti haqida gapirganda hech shubhasiz ushbu dargohni dunyo brendiga aylangan deb mubolag‘asiz ayta olaman.

Qosim-Jo‘mart To‘qayev, Qozog‘iston prezidenti

To‘qayev 10-sinfda o‘qib yurgan vaqtidayoq Moskvadagi ushbu universitetga kirishga jiddiy ahd qilgan. U o‘sha vaqtda institut maqomida bo‘lgan muassasaga imtihonlarni topshirish shartlari haqida bilish uchun rektor nomiga xat ham yuborgan.

Maktubimga javob olganimda hayratda qolganman. Institut rahbariyati bu kabi xatlarga javob yozishi mumkinligini xayolimga ham keltirmagandim. Xullas, hujjatlarimni qabul qilishgan. 4-iyulda birinchi imtihonni topshirdim, 11-iyulda oxirgi imtihonda ishtirok etdim. Ertasi kuni esa meni Podmoskovyedagi kartoshka dalasiga jo‘natishgan.

Qosim-Jo‘mart To‘qayev, Qozog‘iston prezidenti

To‘qayev Moskva davlat xalqaro munosabatlar institutiga 1970-yilda qabul qilingan, u 5-kursda o‘qiyotgan vaqtida Sobiq ittifoqning Xitoy xalq respublikasidagi elchixonasiga olti oylik amaliyotga jo‘natilgan.