Namanganlik fuqaro Bosh prokuraturaga arz qilish uchun Toshkentga kelganida hibsga olinganini ma’lum qildi. Poytaxt IIBB holatni izohladi

Ijtimoiy tarmoqlarda 33 yoshli namanganlik fuqaro Shavkat Yusupovning murojaati aks etgan video tarqaldi. Ushbu videoda fuqaro O‘zbekiston Bosh prokuraturasiga Andijon viloyati prokuraturasi qaroridan noroziligini bildirish uchun Toshkentga kelganini, biroq uni Mirobod tuman ichki ishlar organlari faoliyatini muvofiqlashtirish boshqarmasi xodimlari hibsga olganini ma’lum qilgan.

Toshkent shahar IIBB matbuot xizmati ushbu holatga munosabat bildirdi.

Poytaxt IIBBga Andijon viloyati prokuraturasi organlaridan Shavkat Y. tergov harakatlarini amalga oshirish uchun majburiy tartibda yetkazilishi kerakligi haqida qaror kelib tushgan.

Shuning uchun 21-oktabr kuni fuqaro poytaxtga kelganida Mirobod tumani IIO FMB xodimlari Andijon prokuraturasi tergovchisi qarorini bajarish maqsadida Shavkat Y.ni IIO FMBga olib kelib, Andijon viloyati IIB xodimlariga topshirdi.