Xalq ta’limi vazirligi ishchi guruhlardan o‘qituvchilar faoliyatiga xalaqit bermaslikni so‘radi

Ijtimoiy tarmoqlarda o‘qituvchilar faoliyatini tekshirayotgan guruh haqidagi video e’lon qilindi.

Xalq ta’limi vazirligi matbuot xizmatining xabar berishicha, mazkur video Farg‘ona vodiysida o‘z faoliyatini olib borayotgan ishchi guruh a’zolari ekanligi aniqlandi.

“Ishchi guruhning ba’zi ‘a’zolari’ ularga qo‘yilgan vazifalar nima ekanligini tushunmaganga o‘xshaydi. O‘zbekiston Prezidenti qo‘ygan vazifalarga ko‘ra, ishchi guruh joylarda maktabga borib, ta’lim sifatini o‘rganishi hamda vaziyatni yaxshilash bo‘yicha ko‘mak berishi lozim.

Ishchi guruh vakillari Prezident topshirig‘iga ko‘ra maktablarga yordam berishi kerak. Aksincha, noqonuniy tekshiruvlar ularning vakolatiga kirmaydi. Ishchi guruh vakillari maktablardagi vaziyat va ta’lim sifatini oshirishga ko‘mak bera olmasa, hech bo‘lmasa maktab xodimlariga xalaqit bermasliklarini so‘raymiz”, — deyiladi xabarda.