Mastercard moliya tashkiloti va CrescentRating agentligi tomonidan e’lon qilingan hisobotga ko‘ra, O‘zbekiston musulmon ayol sayyohlar uchun eng qulay mamlakatlar qatoridan o‘rin oldi. Bu haqda Turizmni rivojlantirish davlat qo‘mitasi xabar berdi.
Ekspertlarga ko‘ra, xavfsizlik va diniy ibodatlar, jumladan, islomiy liboslarga bo‘lgan bag‘rikenglik musulmon ayol sayyohlar uchun eng muhim ahamiyatga ega ikki o‘lchov hisoblanadi. Joriy yilning 17-oktabr kuni Singapurda o‘tkazilagan “Halal in Travel Asia” sammiti doirasida e’lon qilingan hisobotga muvofiq, O‘zbekiston Islom hamkorlik tashkilotiga (IHT) a’zo mamlakatlar orasida xavfsizlik va diniy bag‘rikenglik bo‘yicha yuqori o‘rinni egallagan mamlakatlar o‘ntaligidan joy olgan.
Qatar, Ummon, Bruney, Turkiya, BAA, Quvayt va Maldiv davlatlari navbat bilan ro‘yxatning yuqori o‘rinlarini zabt etgan. O‘zbekiston ushbu ro‘yxatning sakkizinchi o‘rnidan joy olgan bo‘lsa, Indoneziya va Malayziya undan keyingi o‘rinlarda kelgan.
“Muslim Women in Travel 2019” hisoboti musulmon ayollar sayohatiga oid jahon miqyosidagi ilk tadqiqot bo‘lib, unda asosan Janubi-sharqiy Osiyo mamalakatlaridan 3300 nafar musulmon ayol ishtirok etgan.
Izoh (0)