OAV: Xitoy Gonkong ma’muriyati rahbarini almashtirishni rejalashtirmoqda

Xitoy hukumati Kerri Lamni Gonkong ma’muriyati rahbari lavozimidan ozod etishni rejalashtirmoqda. Bu haqda “TASS” xabar berdi.

Financial Times nashri manbalariga ko‘ra, mazkur qaror Xitoy raisi Si Szinpin tomonidan ma’qullansa, ma’muriyatning vaqtinchalik rahbari Butunxitoy xalq vakillari yig‘inining yillik sessiyasi bo‘lib o‘tadigan mart oyida tayinlanadi va Lamning vakolatlari yakunlanadigan 2022-yilgacha lavozimda qoladi. Biroq bu yangi nomzod keyinchalik besh yillik muddatga tayinlanishini anglatmaydi.

Ma’muriyat rahbari lavozimiga asosiy nomzodlar qatorida Gonkong Markaziy banki sobiq boshlig‘i Norman Chan va Gonkong hukumatining sobiq bosh vaziri Genri Tan keltirilmoqda.

Nashrning ta’kidlashicha, Xitoy rasmiylari ma’muriyat rahbarini almashtirish haqida uzil-kesil qaror qabul qilish uchun Gonkongda vaziyat barqarorlashishini kutish niyatida.