AQSh davlat kotibi Mayk Pompeo Amerikaning zarurat tug‘ilganda Turkiyaga qarshi harbiy harakatlar amalga oshirishga tayyorligini bildirdi. Ammo u Anqaraning qaysi harakatlari AQSh prezidenti Donald Trampning kuch ishlatish ssenariysini qo‘llashiga sabab bo‘lishi borasida izoh bermagan, deyiladi “Kommersant” xabarida.

“Biz urushdan tinchlikni afzal ko‘ramiz. Biroq prezident Tramp harbiy harakatlarni amalga oshirishga zarurat tug‘ilganda ularni amalga oshirishga tayyorligini bildirgan”, — deya ta’kidlagan Pompeo.

Mamlakat davlat kotibi AQShning harbiy harakatlarni amalga oshirishdan oldin diplomatiya yo‘lidan borishini ham alohida qayd etdi.

Avval Donald Tramp Anqara Suriya shimoli-sharqida nojo‘ya harakatlarni amalga oshirsa Turkiyaning iqtisodiyotini buzib tashlashini bildirgandi. Turkiya “Tinchlik bulog‘i” harbiy operatsiyasi boshlaganidan so‘ng AQSh mamlakat vazirliklari va yuqori lavozimdagi bir nechta amaldorlariga nisbatan sanksiyalar qo‘llagandi.

17-oktabrda Turkiya prezidenti Rajab Toyyib Erdo‘g‘on va AQSh vitse-prezidenti Maykl Pens “Tinchlik bulog‘i” operatsiyasining kurdlar urush hududini tark etishi uchun 120 soatga to‘xtatilishini kelishib olgan. Kelishuvga ko‘ra AQSh kurd jangarilarining Turkiya bilan chegara hududidan 30 kilometrga chekinishi va Anqaraga nisbatan yangi moliyaviy sanksiyalarning qo‘llanilmasligini o‘z zimmasiga olgan.