Fransiya milliy majlisi deputatlari Turkiyani NATO a’zoligidan chiqarishni taklif qildi

Fransiya va Yevroittifoq Turkiyaga to Suriyadagi harbiy operatsiyalar butunlay to‘xtatilmaguniga qadar sanksiyalar qo‘llab, davlatni NATO a’zoligidan ham chiqarmoqchi. Fransiya Milliy majlisining (parlament quyi palatasi) 8 fraksiyasidagi 60 nafar deputat ushbu taklifni hukumatga kiritgan. Bu haqda “TASS” xabar tarqatdi.

“Turkiyaning Suriya Kurdistonida harbiy harakatlarni amalga oshirayotganidan, g‘arb demokratiyasi vakillarining ushbu zo‘ravonlikka beparvo qarayotgani, xalqaro huquq me’yorlarining buzilayotgani, hududdagi beqaror vaziyatning yanada chigallashayotganidan norozimiz. Fransiyani hamda Yevropa ittifoqini bu borada tegishli choralar ko‘rishga chaqiramiz”, — deyilgan deputatlar murojaatida.

Ular taklif etayotgan choralar orasida Turkiyaning harakatlari umumiy xavfsizlikka tahdid ekanini inobatga olib davlatni NATO tarkibidan chiqarib yuborish haqidagi mulohaza ham mavjud. Shuningdek, fransiyalik deputatlar Anqaraga nisbatan ham avval Moskvaga berilgan jazo — moliyaviy sanksiyalar qo‘llashni ham taklif etgan. Shu bilan birga xalq vakillari Parij va Bryusselni “Turkiyaning Yevroittifoqqa kirish bo‘yicha muzokaralarga yo‘l qo‘ymaslik” va “Anqaraga har qanday moliyaviy yordam ko‘rsatishni to‘xtatish” bo‘yicha ham tavsiyalar bergan.

“IShIDga qarshi koalitsiya tarkibida biz bilan ittifoqdosh bo‘lib kurashgan kurdlarni qo‘llab-quvvatlash zarar. Biz uchun kurashgan ayollar-u erkaklar — kurd jangarilari oldida ma’naviy qarzdormiz. Turkiya prezidenti esa yuzsizlarcha ularni IShID hamda jihodchilardek “terrorchi” sanamoqda”, — deyiladi murojaatda.

Deputatlar Fransiyani faol bo‘lishga, Yevropa yordamida tashabbusini boshqarish, barchaga o‘zi va sheriklarining strategik manfaatlarini himoya qilib avvalgi obro‘sini tiklashga chaqirgan.