Fotogalereya: Gang daryosining Himolaydan to Kalkuttagacha bo‘lgan “o‘limi”

Himolay tog‘laridan boshlanuvchi Gang daryosining suvi xuddi go‘dakning ko‘z yoshlari kabi toza. Biroq oqim o‘z manbaidan uzoqlashgani sari yo‘l chetidagi zovurlarni yodga sola boshlaydi. Hindlar ushbu daryoni muqaddas deb biladi, shunga qaramay har kuni uni ifloslantirishni davom etmoqda. BigPicture Gang daryosining suvi Kalkutta shahriga yetib kelguniga qadar shaffoflikdan asar ham qolmaydigan suvga aylangani tasvirlangan suratlarni to‘plab taqdim etdi.

Alaknanda va Bxagiratxi daryolarining qo‘shilish joyi, Gang irmoqlari. Aynan shu yerdan sayyoradagi eng katta daryolardan biri boshlanadi.

Gang hind mifologiyasida — samodan yerga tushgan daryo. Shu sababli uning qirg‘oqlarida ko‘plab diniy marosimlar o‘tkaziladi.

Gang daryosining boshlanishida Devaprayyag shahri joylashgan — hindlarning muqaddas ziyoratgohi. Suratda 19 yoshli Lokesh Sharma tasvirlangan bo‘lib, u rohiblarning to‘rtinchi avlodi hisoblanadi.

Xaridvar shahrida kechki ibodat vaqti. Suv sekin-asta loyqalanib bormoqda. Har kuni minglab hindlar gunohlaridan forig‘ bo‘lish uchun suvda cho‘miladi.

Suvda hatto xudolarining haykallari ham cho‘miladi. Ayrimlari esa suv ostida qolib ketadi.

Daryo suvlari sanoat shahri bo‘lmish Kanpurda to‘q kulrang rangga kiradi. Gang daryosining bu kabi suvlarida cho‘milish dizenteriya, vabo va diareya kabi kasalliklarga olib keladi.

Kanpur — Hindistonning asosiy sanoat shaharlaridan biri va bu yerdagi ishlab chiqaruvchilar chiqindilarni tozalamasdan Gangga tashlaydi.

Suv yuzasida qandaydir qizil chiqindi aralashgan ko‘piklar to‘planib qoladi.

Noekologik ishlab chiqarish korxonalari ko‘p bo‘lgan joylarda esa Gang iflos qizil rangga kiradi.

Undan keyingi manzil — Uttar-Pradesh shtatidagi Mirzapur shahri. Turar joy binolarining kanalizatsiyasi to‘g‘ri daryoga oqadi.

Maishiy chiqindilar ham to‘g‘ri daryoga tashlanadi.

Hindlarning muqaddas joylaridan biri — Varanasi. Bu yerda vafot etgan insonlar ma’lum bir vaqt daryo suviga solib qo‘yiladi.

Shuningdek, ko‘plab odamlar bu yerga cho‘milgani keladi.

Gang daryosining Kalkuttadagi qirg‘oqlarining ko‘rinishi.

Gang daryosi suvining so‘nggi maskani — Bengal ko‘rfazi.