Karate bo‘yicha Toshkentda o‘tayotgan O‘zbekiston kubogi musobaqasida ommaviy mushtlashuv kuzatildi, deb yozadi “Xabar.uz”.
Taqdim etilgan videolavhada sportchilar, hakamlar va murabbiylar o‘rtasidagi dahanaki janglar “qo‘l jangi”ga aylanib ketganini ko‘rish mumkin.
Nashr holatga izoh so‘rab, O‘zbekiston karate milliy federatsiyasi vakili H.Mahbubov bilan bog‘langan.
Vakil mushtlashuv bo‘lganini inkor etmadi, shu barobarida holat bo‘rttirilgani, “pashshadan fil yasamaslik”ni ta’kidlab, bir qancha shaxslarga nisbatan xizmat surishtiruvi boshlangani, bu borada qo‘shimcha ma’lumot berilajagini aytgan.
Ta’kidlanishicha, O‘zbekistonda sportning karate turi jar yoqasiga kelib qolgan. O‘tgan bir yil davomida Tokio Olimpiadasiga yo‘llanma beruvchi 14 ta xalqaro musobaqa o‘tkazilgan. O‘zbekistonlik sportchilar o‘tgan xalqaro musobaqalarning ikkitasida umuman ishtirok etmagan, 11 tasida esa birorta o‘rin nasib etmagan.
Faqat o‘tgan yili Yaponiyada bo‘lib o‘tgan (Tokio—2018) musobaqada bitta sportchi uchinchi o‘rinni egallagan bo‘lsa, Toshkent mezbonlik qilgan Osiyo chempionatida uchta birinchi, bitta ikkinchi va uchta uchinchi o‘rinlar zabt etilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)