“O‘zcharmsanoat”: O‘zbekiston O‘rta Osiyoning teri mahsulotlari tayyorlanadigan markazi bo‘lishi uchun hamma imkoniyatlar mavjud

“O‘zcharmsanoat” uyushmasi raisi o‘rinbosari Farhod Nurmuhammedov O‘zbekistonda O‘rta Osiyo hududida teri va teridan mahsulot tayyorlanadigan markaz bo‘lishi uchun barcha imkoniyatlar mavjudligini aytdi, deb yozadi O‘zA.

Sababi, atrofimizdagi qo‘shni davlatlarda teri-charm sohasiga e’tibor bizdagi kabi kuchli emas. Shuningdek, ularda texnologiyalar ham yetarli emas. Yana bir gap, xomashyo bazasi ham bizdagi kabi ko‘p emas. Bizda esa bu borada imkoniyatlar va imtiyozlar yetarli. Keling, quruq gapdan ko‘ra, aniq hisob-kitoblar bilan gaplashamiz. Misol uchun, O‘zbekistonda 12 millionga yaqin chorva bor. Bu ko‘rsatkich Qozog‘istonda 10,6 million, Qirg‘izistonda 3,8 million, Turkmanistonda 8 milliontani tashkil etadi. Shundan ham ko‘rinib turibdiki, kelgusida markaz tashkil etsak, boshqalardan xomashyo xarid qilib, tayyor mahsulot ishlab chiqarish mumkin.

Ko‘p holatlarda mahsulotlarimizni Turkiya bilan solishtirishadi. Lekin ularda islohotlar 1984—2014-yillarda amalga oshirilganini hisobga olsak, hech bir yutuqqa tezlik bilan erishib bo‘lmasligiga guvoh bo‘lamiz. Ularning tajribasini amaliyotga joriy etish va vaqtdan yutish uchun ikkita turkiyalik mutaxassisni ishga taklif qildik. Ular ko‘magida bir qator loyihalarni amalga oshirish mo‘ljallangan.

Farhod Nurmuhammedov, “O‘zcharmsanoat” uyushmasi raisi o‘rinbosari 

Qayd etish joizki, ayni vaqtda tizimda bir ming bir yuzdan ortiq tashkilot mavjud bo‘lib, ularning 500 tasi uyushmaga a’zo bo‘lgan. 2017-yilda tizim korxonalarida 12 million juft mahsulot ishlab chiqarilgan bo‘lsa, 2018-yilda 51,1 million juftga yetdi. 2019-yilda esa yanada ulkan marra zabt etilishi kutilmoqda. Hozirda 20 davlatga eksport amalga oshirilmoqda.