O‘zbekiston Ichki ishlar vazirligi bloger Dima Qayum bilan bog‘liq “samosud” holatiga izoh berdi.

Foto: Namangan Today

Avvalroq, Dima Qayumning Rishton shahridagi bozorda kutubxona qurilishiga qarshi bo‘lgan bir guruh ayollar tomonidan “samosud” qilingani aks etgan video tarqalgan edi.

Dima Qayumning aytishicha, hamma to‘polon 13-oktabr kuni senator Iqbol Mirzo Rishtonga borib, shahardagi bozorda yangi quriladigan kutubxona uchun ramziy ma’noda g‘isht qo‘yib berganidan keyin boshlangan.

“Ertasiga, ya’ni 14-oktabr kuni tushlikdan so‘ng bir guruh savdogarlar kelib, ‘bu yerda kutubxona qurmaysan, bozor kutubxona bo‘ladigan joy emas’, deb men bilan masala talashib ketishdi. Erkaklar bir chetda qolib, ayollar tortishishni boshladi. Ularni hammasini taniyman, oziq-ovqat, o‘yinchoq va boshqa mahsulotlar sotadigan ayollar. ‘Hali hech kim hech narsa qurmayapti, shunchaki g‘isht qo‘yilgani kutubxona bitdi degani emas’, deb tushuntirsam ham bo‘lmadi. Menga tashlanib, telefonim ekranini ham sindirishdi”, — degan edi bloger.

Dima Qayum “Daryo” muxbiri Azizbek Abduvaliyev bilan suhbatda o‘ziga nisbatan uyushtirilgan “samosud” sabablariga quyidagicha izoh berdi:

“Eski buzilgan joy uchun 15 million so‘m pul berishdi. Bu pulning yoniga qo‘shib-chatib, kutubxona va kitob savdosi bilan shug‘ullanadigan do‘kon qurmoqchiman. Pechkachilik uyda ham bo‘lar. Bozorda bo‘lgan ishni ikki narsa bilan izohlash mumkin — tayyor joyidan, qaynab turgan qozonidan mahrum bo‘lgan savdogarlarning alamzadaligi va go‘yo bozorning boshidan, eng yaxshi yerdan menga joy berilgani”.

Qayd etilishicha, hozirda Rishton tuman IIB Huquqbuzarliklar profilaktikasi bo‘limi tomonidan holatda ishtirok etgan ayollar bilan tergovoldi surishtiruv ishlari olib borilmoqda.