Turkiya mudofaa vazirligi Suriyadagi operatsiyalarda 637 nafar terrorchi yo‘q qilinganini ma’lum qildi

Turkiya harbiy kuchlari Suriyadagi “Tinchlik bulog‘i” operatsiyasida 637 nafar terrorchining yo‘q qilinganini xabar qildi. Ma’lumot vazirlikning Twitter’dagi sahifasida e’lon qilingan, deb yozmoqda “TASS”.

“Suriya shimolidagi Frot daryosi sharqidagi “Tinchlik bulog‘i” operatsiyasida “Kurdiston ishchi partiyasi” hamda “Xalq milliy himoya kuchlari”ning 637 nafar terrorchisi yo‘q qilindi”, — deyilgan xabarda.

Anqara 9-oktabr, chorshanba kuni Suriya shimoli-sharqida “Tinchlik bulog‘i” harbiy operatsiyasining boshlanganini e’lon qilgan. Turkiya hukumati harbiy harakatlardan ko‘zlagan maqsad — Suriya bilan chegara hududida “xavfsiz zona” tuzish va u yerga mamlakatdagi qochoqlarni ko‘chirib o‘tkazish. Jahon hamjamiyati turklarning ushbu harakatlarini qoralamoqda.