Germaniya federativ respublikasi kansleri Angela Merkel Turkiya prezidenti Rajab Toyyib Erdo‘g‘on bilan telefon orqali qilgan muloqot chog‘ida undan Suriya shimoli-sharqidagi harbiy harakatlarni to‘xtatishni so‘radi. Suhbat turk tomonining so‘rovi asosida amalga oshirilgan. Bu haqda “RIA Novosti” xabar berdi.

Foto: Bloomberg

“Suhbatning asosiy mavzusi Turkiyaning Suriya shimoli-sharqida harbiy operatsiyalarning boshlashi sabab mintaqada yuzaga kelgan vaziyat bo‘ldi. Kansler Turkiya rahbaridan ushbu harakatlarni zudlik bilan to‘xtatishni so‘radi. Turkiya ushbu harakatlardan manfaatdor ekaniga qaramay, operatsiya mahalliy aholining ko‘p qismi qochoqlarga aylanishi, hududdagi vaziyatning beqarorlashuvi va IShIDning yanada kuchayishiga olib keladi”, — deya qayd etilgan Germaniya vazirlar mahkamasining bayonotida.

Shuningdek, telefondagi so‘zlashuv davomida tomonlar Suriyaning Idlib viloyatidagi vaziyat hamda Turkiyaning O‘rtayer dengizidagi gaz konlarini sinov tariqasida burg‘ulash mavzularini ham muhokama qilgan.

Avval Germaniya TIV Turkiyaning Suriya shimoli-sharqidagi harbiy harakatlari sabab mamlakatning Anqaraga qurol-yarog‘ sotishni to‘xtatishini e’lon qilgandi.

Turkiya tomoni esa prezident Rajab Toyyib Erdo‘g‘on Angela Merkel bilan suhbat chog‘ida kanslerga Turkiyani yoki Anaqara Suriya shimoli-sharqida urush olib borayotgan Kurdiston ishchi partiyasidan birini tanlashni taklif qilgan.

“Merkel bilan telefon orqali suhbatlashdim. Bunga qadar Germaniya TIV Turkiyaga qurol-yarog‘ sotilmasligini e’lon qilgandi. Men Germaniya kansleriga ‘Tashqi ishlar vazirligining bayonotini ko‘ring. Siz bilan NATO’da ittifoqchimiz shekilli yoki sizlarda NATO ham terrorchilik tashkilotiga aylanganmi? Juda g‘alati munosabat. Siz biz bilanmisiz yoki terrorchilar bilanmi?’ deb savol berdim” – deya qayd etgan Erdo‘g‘on NTV telekanali efirida.

Turkiya prezidenti 9-oktabrda Suriya shimoli-sharqida “Tinchlik bulog‘i” operatsiyasi boshlanganligini e’lon qilgan. Shu kuni Turkiya harbiy havo kuchlari Ras al-Ayn shahri hamda ikki davlat chegarasi yaqinidagi shahar va qishloqlarga havodan zarba bergan.

Keyinchalik turk harbiylari Suriya chegarasidan o‘tib mamlakat hududida harbiy harakatlarni amalga oshirishni boshlab yuborgan.

Suriya hukumati va jahon hamjamiyati Turkiyaning ushbu harakatlarini qoralagan.