Markaziy bank tomonidan O‘zbekiston valyutasining chet el valyutasiga nisbatan kursini aniqlashda faqat bozor mexanizmlaridan foydalanish, talab va taklif asosida aniqladi. Bu hada 11-oktabr kuni Oliy Majlis Senatining 23-yalpi majlisida ma’lum qilindi, deya xabar bermoqda “Daryo” muxbiri Musulmonbek Ibrohimov.
Oliy Majlis Senatining 23-yalpi majlisida “Valyutani tartibga solish to‘g‘risida”gi Qonunga o‘zgartirish va qo‘shimchalar kiritish to‘g‘risida”gi qonun senatorlar tomonidan qabul qilindi. Mazkur Qonun 5 ta bob va 32 ta moddadan tashkil topgan.
Qonun bilan O‘zbekiston Respublikasi Markaziy bankining valyutani tartibga soluvchi davlat organi sifatidagi vakolati kuchaytirilgan.
- Markaziy bankka mamlakat hududida va uning tashqarisida o‘z vakolati doirasida valyuta operatsiyalarini amalga oshirish qoidalari bo‘yicha ijro etilishi majburiy bo‘lgan normativ-huquqiy hujjatlarni qabul qilish huquqi bilan birga, O‘zbekistonda hamda uning tashqarisida barcha turdagi valyuta operatsiyalarini amalga oshirishi huquqi ham berilmoqda.
Valyuta operatsiyalari bo‘yicha buxgalteriya hisobi, statistik va boshqa hisobotlar, shuningdek O‘zbekiston hududida bojxona hamda boshqa majburiy to‘lovlarni hisoblab chiqarish uchun Markaziy bankning valyuta kursini muntazam ravishda belgilab borishi ham qonunda qayd etilgan.
O‘zbekiston milliy valyutasining qadrini oshirish va unga bo‘lgan ishonchni mustahkamlash maqsadida, mamlakat hududida tovarlar (ishlar, xizmatlar) uchun tariflar, narxlar, shuningdek yuridik shaxslarning ustav jamg‘armalari miqdorlariga doir talablar faqat O‘zbekiston valyutasida belgilanishi hamda respublikamiz hududida realizatsiya qilinadigan tovarlar narxining chet el valyutasiga va uning shartli birliklariga bog‘lanishiga yo‘l qo‘yilmasligi ham qonun bilan belgilab qo‘yilmoqda.
Ushbu qonun bilan O‘zbekiston fuqarolariga hech bir cheklovlarsiz xorij banklarida hisob raqami ochish huquqi berilib, amaldagi havolaki me’yorlar bekor qilingan.
Xorijiy investorlarga imkoniyat yaratish maqsadida qonun tashqi savdo operatsiyalari bo‘yicha aktivlarni repatriatsiya qilish bo‘yicha yangi modda bilan to‘ldirilmoqda.
Qonunning 19—22-moddalarida O‘zbekiston banklarining valyuta operatsiyalarini amalga oshirishdagi huquq va majburiyatlari, jinoiy faoliyatdan olingan yoki uni qo‘llab-quvvatlash uchun yo‘naltiriladigan mablag‘lar, Xalqaro valyuta jamg‘armasi Kelishuv moddalari doirasidagi majburiyatlarga rioya qilgan holda, to‘lov balansi barqarorligiga tahdid mavjud bo‘lganda valyuta operatsiyalarini amalga oshirishga cheklovlar o‘rnatish bo‘yicha Markaziy bankning huquqlari va mamlakatga pul mablag‘larini olib kirish, olib chiqish tartibi ham belgilangan.
Bunda, xalqaro tajribadan kelib chiqib va jismoniy shaxslarga qo‘shimcha qulayliklar yaratish, shuningdek mamlakat milliy valyutasining mavqeyini mustahkamlash maqsadida olib chiqiladigan pul mablag‘lari miqdori yuz million so‘m ekvivaletidan oshmagan summadagi milliy valyutada o‘rnatilishi nazarda tutilgan.
Qonunda xalqaro amaliyotga muvofiq Rezidentlar o‘rtasidagi valyuta operatsiyalari, norezidentlar o‘rtasidagi valyuta operatsiyalari, shuningdek, valyutani nazorat qiluvchi organlar huquq va majburiyatlari hamda rezidentlar, norezidentlarning ularga nisbatan tekshirishlar o‘tkazish chog‘idagi huquq va majburiyatlari belgilangan normalar yangi moddalarda alohida yoritilmoqda.
Izoh (0)