Kuba parlamenti Gavanada bo‘lib o‘tgan yig‘ilishda davlat kengashi raisi Migel Dias-Kanelni mamlakat prezidenti etib sayladi. Respublika vitse-prezidenti etib davlat kengashi raisi o‘rinbosari Salvador Valdes saylangan, deb xabar beradi “Kommersant”.
“Milliy saylov kengashi prezidenti Alina Balseyro ovoz berish jarayonlari natijasini ma’lum qildi. Respublika prezidenti: Migel Dias-Kanel; vitse-prezident: Salvador Valdes”, — deyiladi parlament xabarida.
Granma mahalliy gazetasining yozishicha, Migel Dias-Kanel uchun 605 nafar duputatning 579 nafari ovoz bergan. Kuba prezidentligiga jami 17 kishi da’vogarlik qilayotgan edi. Dias-Kanelning o‘rniga davlat kengashi raisi etib parlament spikeri Esteban Laso Ernandes tayinalandi.
Eslatib o‘tamiz, joriy yilning fevralida kubaliklar referendum orqali yangi konstitutsiya qabul qilinishini ma’qullagan edi. Kuba yangi konstitutsiyasi mamlakat rahbari sifatida ikki marta besh yildan saylanishni, shuningdek, xususiy mulk huquqini belgilab beradi.
Izoh (0)