Ijtimoiy tarmoqlarda Farg‘onada “Mast xodim” reydidan qochgan IIB inspektori ayolni xizmat mashinasida urib o‘ldirganligi haqida xabarlar tarqaldi. Viloyat ichki ishlar boshqarmasining matbuot xizmati mazkur holat yuzasidan munosabat bildirdi. Munosabat O‘zA tomonidan e’lon qilindi.
Munosabatda aytilishicha, ijtimoiy tarmoqlarda tarqalgan xabarlarda YTH sababchisi deya ko‘rilayotgan A.E. qoni tekshirilganda oz miqdorda alkogolli ichimlik iste’mol qilgani yuzaga chiqqan. Biroq 25-sentabr kuni soat 20:30 da sodir bo‘lgan voqea paytida profilaktika inspektori A.E. mutlaqo mast holatda bo‘lmagan. Buni Farg‘ona shahar narkologiya dispanserining xulosasi tasdiqlagan.
A.E. IIB ichki xavfsizlik xizmati spirtli ichimlik ichgan xodimlarni aniqlash maqsadida o‘tkazgan reyd davomida qo‘lga tushib qolishdan qochayotgan paytda urib yuborganligi ham hech qanday asosga ega emas, deyiladi viloyat IIB bayonotida.
Qayd etilishicha, o‘sha kuni xodimlar uchun hech qanday reyd tadbirlari o‘tkazilmagan. Xodim xizmat avtomashinasida emas, balki o‘zining shaxsiy Matiz rusumli avtomobilida hushyor holda bo‘lgan. Hodisa ro‘y bergan kuni A.E. avtomashinani Farg‘ona shahar S.Temur ko‘chasidan A.Navoiy ko‘chasi tomonga boshqarib ketayotib, shu ko‘chada joylashgan “Shox” kafesi ro‘parasiga yetgan vaqtida to‘satdan avtomashina oldiga chiqib qolgan ayolni urib yuborib, yo‘l-transport hodisasi sodir etgan.
Og‘ir tan jarohati olgan ayolni A.E.ning o‘zi Farg‘ona shahridagi Respublika shoshilinch tez tibbiy yordam ilmiy markazi viloyat filialiga olib borgan. Biroq ayol shifoxonaga yetib borgan vaqtda vafot etgan.
Mazkur holat bo‘yicha voqea joyida olib borilgan surishtiruv harakatlari davomida voqeaning guvohi bo‘lgan fuqarolar A.N., D.M., Sh.O., U.R. tomonidan ma’lum qilinishicha, YTHga uchragan ayolni dastlab yo‘lning qarama-qarshi tomonidan harakatlanib kelgan Nexia rusumli avtomashina urib yuborgan, undan keyin ushbu ayol Matiz avtomashinasiga borib urilgan. Nexia’ni ushlash choralari ham ko‘rilgan.
O‘zbekiston tumani IIB profilaktika inspektori, katta leytenant A.E.ga nisbatan tergov harakatlari olib borilmoqda.
Izoh (0)