Sobiq MXX amaldori Nodir To‘raqulovning qudasiga qarashli metan gaz quyish shoxobchasi sotildi

Milliy xavfsizlik xizmati sobiq xodimi Nodir To‘raqulov va uning jinoiy sheriklari O‘zbekiston Respublikasi Harbiy sudining hukmi bilan uzoq yilga jinoiy javobgarlikka tortilgan edi. Jinoyat ishi doirasida sudlanuvchilarning jinoiy yo‘llar bilan orttirilgan qator mulklari davlat egaligiga o‘tkazilgan, deb yozmoqda “Xabar.uz”.

Nashrning xabar berishicha, hukm ijrosi doirasida “Jarqo‘rg‘on-Servis-Texnika” MChJga qarashli Sho‘rchi tumanida joylashgan avtomobillarga texnik xizmat ko‘rsatish hamda ko‘p tarmoqli yoqilg‘i quyish shoxobchasi MIBning shu tuman bo‘limi tomonidan elektron onlayn-auksion savdosiga chiqarildi.

Avvaliga ushbu bino va inshootlar 14 milliard so‘mdan ortiq narxga baholangandi. Biroq buncha pulga sotib oladigan xaridor topilmagach, tartibga ko‘ra, uning narxi arzonlashtirildi.

Shu yilning 3-oktabr kuni o‘tkazilgan savdoda esa yaqin-yaqingacha Nodir To‘raqulovning qudasi Erkin Norqobilovga tegishli bo‘lgan ushbu metan gaz quyish shoxobchasi 7,041 milliard so‘mga sotildi.