Prezident Shavkat Mirziyoyev Toshkentda yangidan ishga tushgan Toshkent chinni zavodi faoliyatiga doir tavsiyalar berdi. Bu haqda Prezident matbuot xizmati xabar bermoqda.

Foto: Prezident matbuot xizmati

Shavkat Mirziyoyev Toshkent chinni zavodining qayta tiklanishi haqida 2018-yil iyun oyida Olmazor aholisi bilan bo‘lgan muloqot chog‘ida ma’lum qilgan edi. Qayd etishlaricha, 87 milliard so‘m evaziga qaytadan ishga tushirilgan zavodda yiliga 30 million dona oshxona idishlari, suvenirlar, binolarning ichki bezaklari ishlab chiqarilishi rejalashtirilgan.

“Bu zavod — O‘zbekistonning faxri. Ilgari respublikamizga mehmon kelsa yoki yurtdoshlarimiz chet elga borsa, shu zavod to‘plamlaridan sovg‘a qilinardi. Endi ushbu yangi korxona undan ham chiroyli, sifatli va qadrli mahsulotlar tayyorlashi kerak”, — dedi Shavkat Mirziyoyev.

“Mamlakatimizda shuncha uylar qurilyapti, odamlarning hayot sifati o‘zgaryapti. Yangi uyga ko‘chgan har bir oila albatta chinni buyumlar sotib oladi. Yubileylar, festivallarga bag‘ishlangan, sovg‘a uchun to‘plamlar ham chiqarish mumkin. Buning uchun dizayn ustida ishlash, bozor talabini o‘rganib, olimlar va texnologlar bilan hamkorlikda zamonaviy mahsulotlar tayyorlash, yangi brendlar yaratish kerak. Masalan, milliy naqshlarimiz, so‘zanalarimiz bu borada katta manba bo‘la oladi”, — deb qo‘shimcha qilgan Prezident.

Foto: Prezident matbuot xizmati

Avvalroq Prezident Olmazor tumanida qurilishi davom etayotgan Olmazor Business City ishbilarmonlik markazini borib ko‘rgani haqida xabar berilgan edi. Bu yerda, xususan, 2 100 xonadonga mo‘ljallangan 28 ta ko‘p qavatli uy qurilmoqda. Davlat rahbari uylarning sonini ko‘paytirish hisobidan narxini pasaytirish zarurligi haqida gapirgan edi.