Prezident Shavkat Mirziyoyev 9-oktabr kuni Olmazor tumanida yangi joyda qad rostlagan Toshkent chinni zavodini borib ko‘rdi, deya xabar bermoqda Prezident matbuot xizmati.

Davlat rahbari bu zavodning qayta tiklanishi haqida 2018-yil 29-iyun kuni Olmazor tumani aholisi bilan muloqot chog‘ida aytgan edi.

Foto: Prezident matbuot xizmati

1952-yilda ishga tushirilgan mazkur zavodda choynak, piyola, kosa, tarelka, lagan, ko‘za kabi milliy uslubdagi buyumlar, suvenirlar tayyorlangan. “Oq oltin”, “Tong”, “Uzum”, “Tovus” kabi to‘plamlar xalqaro ko‘rgazmalarda oltin medallarga sazovor bo‘lgan, ko‘plab mamlakatlarga eksport qilingan. Ammo keyinchalik zavod xususiylashtirilib, ishlab chiqarish to‘xtab qolgan.

Prezident topshirig‘iga muvofiq, zavod faoliyatini qayta tiklash maqsadida “Aloqabank” tomonidan umumiy qiymati 87 milliard so‘mlik loyiha amalga oshirildi. Foydalanilmayotgan obyekt rekonstruksiya qilinib hamda qo‘shimcha binolar qurilib, Xitoyning Huanggang Huauao Zhongbo Klin Technology kompaniyasi uskunalari o‘rnatildi. 300 ta ish o‘rni yaratildi.

Foto: Prezident matbuot xizmati

Zavodda yiliga 30 million dona oshxona idishlari, suvenirlar, binolarning ichki bezaklari ishlab chiqariladi. 100 foiz mahalliy xomashyodan foydalaniladi. Mahsulotlar import o‘rnini to‘ldirib, Rossiya, Ukraina, Gruziya, Ozarbayjon va Markaziy Osiyo davlatlariga eksport ham qilinadi.

“Mutasaddilar bilan suhbatda zavod faoliyatini kengaytirib, klasterga aylantirish, yanada ko‘p xotin-qizlar va yoshlarni ishga jalb etish bo‘yicha ko‘rsatmalar berildi”, — deyiladi Prezident matbuot xizmati axborotida.

Foto: Prezident matbuot xizmati

Qo‘shimcha qilishlarimcha, Shavkat Mirziyoyev zavodga tashrif davomida chinni buyumlar muzeyini ko‘zdan kechirgan, zavodda ishlagan mehnat faxriylari bilan suhbatlashgan.