AQSh Shinjon-Uyg‘ur muxtor tumanida uyg‘urlar, etnik qozoqlar va boshqa kam sonli musulmon millatlar vakillari qo‘lga olinishi hamda zulm qilinishi uchun javobgar bo‘lgan Xitoy hukumati va Kommunistik partiyasi a’zolariga nisbatan viza cheklovlarini joriy etdi.
Cheklovlar Xitoy mansabdorlarining oila a’zolariga ham tatbiq etilishi mumkin.
“Qo‘shma Shtatlar Xitoy Xalq Respublikasini Shinjondagi repressiv kampaniyani zudlik bilan to‘xtatish, barcha asossiz qo‘lga olinganlarni qo‘yib yuborish, xorijda yashayotgan Xitoy musulmonlarini ularni mavhumlik kutayotgan vataniga qaytishga majburlashga urinishlarni bas qilishga chaqiradi”, — deyiladi Qo‘shma Shtatlar Davlat kotibi Maykl Pompeoning 8-oktabr, seshanba kuni e’lon qilingan bayonotida.
Shuningdek, AQSh Savdo vazirligi Shinjondagi repressiv siyosatga aloqador 28 tashkilotga mahalliy mahsulotlar eksport qilinishiga cheklov o‘rnatdi.
O‘z navbatida, Xitoyning AQShdagi elchixonasi viza cheklovlari va boshqa taqiqlar xalqaro munosabatlar me’yorlariga zid ekanligini bildirgan.
“Shinjonda inson huquqlari borasida muammolar yo‘q. Vashingtonning ayblovlari ichki ishlarga aralashuv uchun bahona bo‘lib xizmat qilmoqda. Shinjonda terrorizm va ekstremizm ko‘rinishlariga qarshi ko‘rilayotgan choralar xalqaro amaliyotga mos keladi va bu yerda istiqomat qilayotgan turli millatga mansub 25 million kishi tomonidan qo‘llab-quvvatlanadi”, — deyiladi elchixona bayonotida.
Izoh (0)