Toshkent shahrining Mirzo Ulug‘bek tumanida 5-oktabrdan 6-oktabrga o‘tar kechasi gaz quvuri shikastlanishiga olib kelgan YTH sodir bo‘ldi, deb xabar bermoqda IIBB matbuot xizmati.
Tumanning Qorasuv dahasida VAZ-2106 mashinasini boshqarayotgan 25 yoshli Husniddin X. tungi soat 1:41 atrofida Chaxbud ko‘chasidagi gaz quvurini ushlab turgan ustunga borib urilgan. YTH sababli gaz quvurining butunligiga ziyon yetib, gaz-havo aralashmasi o‘t olib, yong‘in sodir bo‘lgan.
Hodisa haqida Davlat yong‘in xavfsizligi boshqarmasiga soat 1:41 da ma’lum qilingan. O‘t o‘chiruvchilar voqea joyiga 8 daqiqadan keyin yetib kelib, yong‘in soat 2:30 da to‘liq bartaraf etilgan.
Voqea oqibatida jabr ko‘rganlar va qurbonlar yo‘q. Falokatga avtomobil tormoz tizimi nosozligi sabab bo‘lgan deb taxmin qilinmoqda.
Haydovchiga nisbatan Ma’muriy javobgarlik to‘g‘risidagi kodeksning 134-moddasi (Haydovchilarning yo‘l harakati qoidalarini buzishi transport vositalarining yoki boshqa mol-mulkning shikastlanishiga olib kelishi) bo‘yicha ma’muriy qoidabuzarlik haqidagi bayonnoma rasmiylashtirilgan.
Izoh (0)