Sohib Rajabov ismli fuqaro O‘zbekistonning naqadar xavfsizlik mamlakat ekanligini isbotlash uchun 2019-yil 1-iyulida Andijon viloyatining Xonobod shahridan Qoraqalpog‘istonning Mo‘ynoq tumaniga piyoda yo‘lga chiqib, oradan 2 oy 5 kun o‘tib To‘rtko‘l shahriga yetib keldi. Bu haqda O‘zA xabar berdi.

Foto: Sohib Rajabov

Uning 2200 kilometr masofani tashkil qiladigan yo‘nalish bo‘ylab yurishidan maqsad O‘zbekistonning nechog‘li xavfsiz va mehmondo‘st yurt ekanligini namoyish etish ekanligi bildirilgan.

Sohib Rajabov o‘zining Telegram messenjeridagi “Peshkom po Uzbekistanu” kanalida To‘rtko‘l tumaniga yetib kelganligini ma’lum qilgan. To‘rtko‘ldan Mo‘ynoqqacha yana 400 kilometrga yaqin masofani bosib o‘tishi kerak. U ko‘p piyoda yurganligi sababli yo‘lda bir necha bor to‘xtab, shifoxonada davolanishiga to‘g‘ri kelgan. Sohib yo‘l bo‘yi ko‘rgan-bilganlarini fotoga tushirib, kanaliga joylashtirib bormoqda.

Jumladan, 3 yildan buyon butun dunyoni velosipedda sayr qilib yurgan yaponiyalik Nao hamda Kanada va Ukrainadan Buxoro bilan Samarqandni ko‘rish uchun velosipedda kelayotgan xorijlik mehmonlar bilan uchrashganini hikoya qilgan.