Shavkat Mirziyoyevning 12-sentabr kuni “Xitoy Xalq Respublikasi, shu jumladan, Xitoyning Gonkong maxsus ma’muriy hududi fuqarolari uchun O‘zbekistonga kirishda vizasiz rejimni belgilash to‘g‘risida”gi farmoni imzoladi. Turizmni rivojlantirish davlat qo‘mitasi raisi vazifasini vaqtincha bajaruvchi Abdulaziz Oqqulov “Dunyo” axborot agentligiga bergan intervyusida shu haqda so‘zlab berdi.
Iqtisodiy barqaror davlatlar fuqarolari uchun viza tartibini yanada erkinlashtirish turizm sohasini rivojlantirishning ustuvor yo‘nalishlaridan biri hisoblanadi.Shu bois xalqaro tajribadan kelib chiqqan holda mamlakatimizda viza tartibini bosqichma-bosqich soddalashtirish amalga oshirilmoqda. Xususan, 2018-yil 9 mamlakat fuqarolari uchun viza rejimi bekor qilingan bo‘lsa, 2019-yil 47 mamlakat fuqarolari uchun vizasiz rejim o‘rnatildi.
Statistik ma’lumotlarga nazar soladigan bo‘lsak, mazkur islohotlarning samarasini ko‘rish mumkin. Xususan, fuqarolari vizasiz kirish rejimiga ega bo‘lgan mamlakatlardan O‘zbekistonga joriy yilning birinchi yarmida kelgan xorijiy sayyohlar soni o‘tgan yilning shu davriga nisbatan 58 foizga oshdi. Yurtimizga kelgan chet ellik sayyohlar soni esa 27 foizga ko‘paydi.
O‘zbekiston Respublikasi Prezidenti 12-sentabr kuni ushbu yo‘nalishdagi islohotlarning davomi sifatida “Xitoy Xalq Respublikasi, shu jumladan, Xitoyning Gonkong maxsus ma’muriy hududi fuqarolari uchun O‘zbekistonga kirishda vizasiz rejimni belgilash to‘g‘risida”gi farmonga imzo chekdi. Bu esa Xitoy fuqarolari uchun mamlakatimiz aeroportlari orqali 7 kunlik muddatga vizasiz rejim joriy etishni nazarda tutadigan muhim hujjat bo‘ldi.
Ma’lumki, Xitoy dunyodagi jadal rivojlanayotgan davlatlardan biri bo‘lib, yalpi ichki mahsulot jon boshiga 18,1 ming dollarni tashkil etmoqda. Bu esa mamlakatda tashqi turizm rivojiga ham ijobiy ta’sir o‘tkazmoqda. Xususan, 2018-yil xorijga sayohat qilgan xitoyliklar qariyb 150 million kishini tashkil etdi va bu dunyodagi eng katta ko‘rsatkich bo‘ldi.
Bundan avval O‘zbekiston Respublikasi Prezidentining qarorlari bilan XXR fuqarolari uchun mamlakatga kirish va elektron kirish vizalaridan foydalanishning soddalashtirilgan tartibi joriy etilgan edi. Ushbu chora-tadbirlar natijasida O‘zbekistonga 2018-yil kelgan xitoylik sayyohlar 2017-yilga nisbatan 34 foiz ko‘pchilikni tashkil qildi. Joriy yil yanvar—avgust oylarida esa bu ko‘rsatkich o‘tgan yilga nisbatan 74 foizga oshdi.
XXR fuqarolari uchun vizasiz rejimning joriy etilishi chet ellik sayyohlar soni va o‘z navbatida, turistik xizmatlarni eksport qilishdan keladigan daromad hajmining ko‘payishiga xizmat qiladi.
Abdulaziz Oqqulov, Turizmni rivojlantirish qo‘mitasi raisi vazifasini bajaruvchi
Izoh (0)