Abu-Dabida bir kunda 2500 kishiga xizmat ko‘rsatuvchi yirik shifoxona ochiladi

Abu-Dabi shahrida 3-noyabr kuni BAAdagi eng yirik shifoxonalardan biri Sheikh Shakhbout Medical City ochiladi, deb xabar berdi Business Emirates.

Yangi tibbiy muassasa bir kunda 2500 nafargacha bemorlarga xizmat ko‘rsatadi.

Xususan, uning hududida shahar travmatologiya markazi joylashadi. Shifoxona amirlikning chekkasidagi yirik magistral yo‘llar kesishmasida joylashganligi sababli bemorlar va tez tibbiy yordam tirbandliklarni chetlab o‘tib, bu yerga kelishi osonlashadi.

Klinika barcha yoshdagi bemorlarga — chaqaloqlardan tortib, keksa yoshdagi insonlarga ham xizmat ko‘rsatadi.

Shifoxonada 732 ta koyka va 18 ta operatsion xona bo‘ladi. Keng qamrovli jarrohlik amaliyotlarining bir qismi robotlar tomonidan amalga oshiriladi. Shifoxonada 3000 nafar tibbiy xodim faoliyat yuritadi.

Qayd etilishicha, shifoxonada kuyish markazi, urologiya, revmatologiya, yurak qon-tomir jarrohligi, endokrinologiya va boshqa markazlar ham bo‘ladi.