Rossiya neftining “Drujba” neft quvurida neftning ifloslanishini “Transneft” kompaniyasi vitse-prezidenti Sergey Andronov yoqimsiz istisno deb atadi. Bu haqda “RIA Novosti” xabar berdi.
Andronovning so‘zlariga ko‘ra, ayni paytda bunday hodisalarning oldini olish uchun barcha choralar ko‘rilmoqda. Uning qo‘shimcha qilishicha, joriy yil yakuniga ko‘ra, kompaniya Belarusga tranzit qilinayotgan neft hajmini 6,4 million tonnaga kamaytiradi.
Joriy yilning aprel oyida Belarus orqali Yevropa mamlakatlariga neft eksport qilinadigan “Drujba” neft quvurlari tizimiga xloridlar bilan ifloslangan neft tushgan. Bu juda xavfli bo‘lib, bunday sharoitda qurilmalarni zararlovchi tuzli kislota hosil bo‘ladi. Natijada, bir nechta mamlakat, xususan, Ukraina va Polsha neftni qabul qilishni to‘xtatishga majbur bo‘ldi.
Ifloslanish Samara—Unecha uchastkasida yuz bergan. Holat yuzasidan jinoiy ish qo‘zg‘atilgan, olti kishi bir million rubl qiymatdagi neft o‘g‘irlaganlikda va xomashyoni ifloslaganlikda gumonlanmoqda. Hodisadan keyin Belarus prezidenti Aleksandr Lukashenko uning mamlakati 20 million dollar miqdorida kompensatsiya olishi mumkinligi haqida ma’lum qilgan.
Izoh (0)