Inson huquqlari bo‘yicha milliy markaz Shuhrat G‘aniyevga berilgan sinov muddati boshqa mansabdor shaxslar uchun ham ibrat bo‘lishini ma’lum qildi

Inson huquqlari bo‘yicha milliy markaz Farg‘ona viloyati hokimining tarmoqlarda tarqalgan nutqiga munosabat bildirdi.

Farg‘ona viloyati hokimining ijtimoiy tarmoqlarda tarqalgan nutqi ko‘plab salbiy e’tirozlarga sabab bo‘ldi.

Senator Shuhrat G‘aniyevning nutqida Konstitutsiya va qonunlarimizga xilof gaplar aytilgan. Bunday nutq va xulq ma’naviyatimizga ham to‘g‘ri kelmaydi.

Asosiy qonunimizda inson qadr-qimmati yuksak darajaga ko‘tarilgan. O‘zbekiston Konstitutsiyasida qayd etilganidek, har kim o‘z sha’ni va obro‘siga qilingan tajovuzlardan, shaxsiy hayotiga aralashishdan hamiyalanish daxlsizligi huquqiga ega. Inson huquqlari bo‘yicha O‘zbekiston milliy markazi, shuningdek, ushbu masala Oliy Majlis Senatining Reglament va odob komissiyasi yig‘ilishida tezkor ko‘rib chiqilib, tegishli chora belgilanganini qo‘llab-quvvatlaydi.

Senat komissiyasi yig‘ilishida Farg‘ona viloyati hokimiga qat’iy ogohlantirish va 3 oy sinov muddati berilgani boshqa mansabdor shaxslar uchun ham ibrat bo‘lishi lozim.

Inson huquqlari bo‘yicha milliy markaz matbuot xizmati