Navoiy viloyati IIB internetda “sun’iy yo‘l notekisligi”ga doir tarqatilgan ma’lumotlar yuzasidan raddiya berdi.
Tarmoqda tarqalgan xabarlarga ko‘ra, Navoiy—Zarafshon avtomobil yo‘lining cho‘ldan o‘tadigan qismida sun’iy to‘siq o‘rnatilgan kuni hech qanday ogohlantiruvchi yo‘l belgi bo‘lmagan. Shuningdek, kamida 7 ta mashina to‘siqdan katta tezlikda o‘tib, boshqaruvni yo‘qotib, YTHga uchragani, buning oqibatida ikki nafar odam o‘lgani, og‘ir tan jarohati olganlar ham borligi ta’kidlangan.
Viloyat IIBning “Daryo”ga ma’lum qilishicha, Navoiy viloyati hududidagi xalqaro ahamiyatga ega A-379 yo‘lida (Konimex tumani hududida) so‘nggi 4 yil ichida sodir etilgan YTHlar tahlil qilinganida, jami 64 ta ko‘ngilsiz hodisalar sodir etilgani kuzatilgan. Shundan, halok bo‘lganlar soni jami 33 nafar, jarohatlanganlar soni esa 57 nafardan iborat bo‘lib, uxlab qolganlar 70 foizni tashkil qilgan.
Yo‘l transport hodisalarining oldini olish maqsadida Vazirlar Mahkamasining 2019-yil 9-apreldagi “Yo‘l harakati qoidalariga o‘zgartirish va qo‘shimchalar kiritish to‘g‘risida”gi qaroriga asosan A-379 yo‘lida sun’iy yo‘l notekisligi o‘rnatilgan. 1.31-‘Sun’iy yo‘l notekisligi’ga sharh berilib, yo‘lning sun’iy notekislik o‘rnatilgan qismiga yaqinlashayotganligi to‘g‘risida ogohlantirishi, transport vositasining harakatlanish tezligini majburiy tarzda kamaytirish uchun qo‘llanilishi tushuntirilgan.
“Sun’iy yo‘l notekisligining balandligi 2—2,5 santimetr bo‘lib, u hech qanday yo‘l transport hodisasini keltirib chiqarmaydi. Aksincha, bir xil manzarani tashkil etuvchi olis masofadagi yo‘llarda harakatlanib borayotgan avtomashinada uxlab qolgan haydovchini sergaklikka undaydi. Bu esa o‘z navbatida har qanday transport vositasi bilan sodir etilishi mumkin bo‘lgan ko‘ngilsiz hodisalarning oldini olishga xizmat qiladi”, — deyiladi viloyat IIB bayonotida.
Izoh (0)