Andijon shahridagi Zahiriddin Muhammad Bobur Universal Academy nodavlat ta’lim muassasasining 82 nafar o‘quvchisi, 3 nafar o‘qituvchisi va to‘rt nafar boshqa xodimi ovqatdan zaharlanish tashxisi bilan kasalxonaga yotqizilgan. Bu haqda Sog‘liqni saqlash vazirligi Jamoatchilik bilan aloqalar bo‘limi “Daryo”ga xabar berdi.
30-sentabr, dushanba kuni muassasaning o‘zida joylashgan “Yusuf shirin mazali nonlari” MChJga qarashli maktab oshxonasida tushlik uchun tayyorlangan ovqat mahsulotlarini 217 nafar o‘quvchi va 19 nafar xodim iste’mol qilgan (1-ovqat no‘xotli sho‘rva, 2-ovqat lag‘mon).
Tushlikdan 2—3 soat o‘tib ovqatlanganlarda ko‘ngil aynishi, ich ketishi, subfebril harorat belgilari kuzatila boshlagan, zudlik bilan tez yordam chaqirilib, yuqoridagi belgilar yuzaga kelgan bemorlar shifoxonaga olib kelingan.
Mavzuga doir: Bekobodda bog‘cha bolalari ovqatdan zaharlandi
Shifoxonada davolanayotgan bemorlarning uch nafari o‘rta og‘irlikda reanimatsiya bo‘limida davolanmoqda, barcha bemorlarga yetarli shart-sharoitlar, dori-darmonlar zaxirasi yaratilgan.Viloyat sog‘liqni saqlash boshqarmasida alohida tezkor shtab tashkil etildi, barcha bemorlar nazorat ostida, shifoxonaga yotqizilmagan o‘quvchilarning ota-onalariga bog‘lanib, holat yuzasidan tegishli tavsiyalar berib borilmoqda.
Yuz bergan holatni shaxsan Sog‘liqni saqlash vazirligi va viloyat hokimligi o‘z nazoratiga olgan, Sog‘liqni saqlash vazirligining malakali mataxassislaridan iborat ishchi brigadasi safarbar etildi.
Sanitariya-epidemiologik osoyishtalik agentligi hududiy bo‘limi xodimlari tomonidan ovqat na’munalari olinib, kasallanish sabablari o‘rganilmoqda.
Sog‘liqni saqlash vazirligi
Izoh (0)