“O‘zstandart” elektrotexnika importini cheklash taklifi yuzasidan tushuntirish berdi

“O‘zstandart” agentligi O‘zbekistonga elektrotexnika olib kirishning yangi tartibini joriy etish taklif qilinayotgan Vazirlar Mahkamasi qarorini jamoatchilik muhokamasiga qo‘ygani haqida xabar berilgan edi. Agentlik matbuot xizmati joriy etilishi ko‘zda tutilayotgan yangi tartiblar yuzasidan tushuntirish berdi.

Agentlik milliy qonunchilik va xalqaro amaliyot me’yorlariga tayangan holda, O‘zbekiston Monopoliyaga qarshi kurashish qo‘mitasiga iste’molchilar huquqlarini himoya qilish zarurligi yuzasidan o‘z munosabatini bildirdi, xususan:

• mahsulot haqida, shuningdek, ishlab chiqaruvchi (ijrochi, sotuvchi) haqida to‘g‘ri va to‘liq ma’lumotga ega bo‘lishga imkon yaratilishi;
• mahsulotning tegishli darajada sifatli va xavfsiz bo‘lishi;
• iste’molchining hayoti, sog‘lig‘i va mol-mulki uchun xavfli nuqsoni bo‘lgan tovar (ish, xizmat), shuningdek, ishlab chiqaruvchi (ijrochi, sotuvchi)ning g‘ayriqonuniy harakati (harakatsizligi) tufayli yetkazilgan moddiy ziyon, ma’naviy zararning to‘liq hajmda qoplanishini ta’minlash lozimligi haqida.

Shu bilan birga, mahsulotlarning xizmat davri, yaroqlilik muddatlari hamda ularga kafolat bera olmaydigan ayrim sotuvchilar faoliyati iste’molchilarni chalg‘itishga sabab bo‘layotganligi va buning oqibatida qonuniy huquq va manfaatlar ta’minlanmayotganligi ta’kidlandi.

Mahsulotlar bozorida sog‘lom raqobat muhitini yaratish uchun barcha sotuvchilarga savdoda shaffoflik, tenglik tamoyili asosida sharoitlar yaratilishi lozimligi keltirildi.

Bunda, ishlab chiqaruvchi tomonidan standartlar, texnik talablar va qoidalarga rioya qilgan holda iste’molchilarning qonuniy huquqlarini ta’minlashning asosida amalga oshirilishi lozim.

Shuningdek, mahsulot sifati bo‘yicha talabning mavjudligi va sotuvchining xaridor oldidagi majburiyatini kafolatlash raqobatni cheklashga emas, balki bunda iste’molchining hayoti va iqtisodiy tejamkorligini ta’minlanishiga olib keladi.

O‘zbekistonda ichki bozor o‘rganilganda, mahalliy ishlab chiqaruvchilar bilan bir qatorda servis markazlari orqali sifatli xizmatlar ko‘rsatish majburiyatini olgan Samsung, LG, Tefal, Hoffman, BOSCH, Gree kabi o‘nlab mashhur kompaniyalarning vakillari ham respublikaning barcha hududlarida faoliyat ko‘rsatayotgani bildirildi.