“O‘ztransgaz” AJ Andijon viloyati hududiy gaz ta’minoti filiali 6-son Shahrixon tumanlararo uchastkasi Baliqchi tuman bo‘limi mansabdor shaxslari 2018-yilni oktabr—noyabr oylarida Baliqchi tuman “Alchazor” MFYga tortilgan L-2700 pIm masofadagi gaz quvurini yuqori bosimli gaz taqsimlash qutisi (GTQ)ga ulanish nuqtasini o‘zboshimchalik bilan uzib tashlagan. Bu haqda “Daryo”ga Majburiy ijro byurosi matbuot xizmati xabar berdi.
Shundan so‘ng yuqori bosimli gaz taqsimlash qutisi (GTQ)ni chetlab o‘tib, loyiha va texnik shart talablariga zid ravishda yer ostidan to‘g‘ridan-to‘g‘ri Baliqchi AGTShdan Baliqchi tuman markaziga tortilgan yer usti yuqori bosimli D-273 mm gaz quvuriga fuqarolar Mirjalo Jo‘rayev, Xondamir Sattorov va Soli Xoliqov (ismi o‘zgartirilgan)larni noqonuniy ulanishiga sharoit yaratgan.
Mirjalo Jo‘rayev, Xondamir Sattorov va Soli Xoliqovlar gaz tarmog‘iga yashirin tarzda, yer ostidan ulanib, ohak xumdonlarida foydalanishi oqibatida 4 milliard 377 million so‘m zarar keltirib chiqargan.
Olinganlar ma’lumotlarga ko‘ra, 2017—2018-yillar va 2019-yil yanvar-aprel oylarida “Baliqchi avtomatik gaz taqsimlash shoxobchasi” orqali jami 24 619 678 metr kub tabiiy gaz yetkazilgan bo‘lib, aholi va ulgurji iste’molchilarga 13 901 928 metr kub tabiiy gaz sotilganligi hajmlari o‘rtasida 10717750 metr kub tafovut aniqlangan.
Mazkur tafovut ta’minotchi korxona tomonidan go‘yoki noreal qarzdorlik deb baholangan va hisobotlarida shunday aks ettirilgan.
Aslida esa bu noreal qarzdorlik yuqoridagi ta’minotchi korxona sherik bo‘lgan fuqarolar M.J., X.S., S.X.lar tomonidan yer osti orqali tabiiy gaz tarmog‘idan o‘g‘rincha foydalanish hisobiga yuzaga kelgan, — deyiladi xabarda.Mazkur holat yuzasidan MIB Andijon viloyati boshqarmasi tomonidan 24-sentabr kuni ta’minotchi korxona mansabdor shaxslari va boshqalarga nisbatan Jinoyat kodeksining 185-moddasi 4-qismi bilan jinoyat ishi qo‘zg‘atilib, surishtiruv harakatlari olib borilmoqda.
Izoh (0)