Tashqi ishlar vaziri Abdulaziz Komilov boshchiligidagi delegatsiya 2019-yil 30-sentabr kuni Fransiyada bo‘ladi. Bu haqda TIV matbuot xizmati ma’lum qildi.
Delegatsiya bu yerda Fransiya sobiq prezidenti Jak Shirakning dafn marosimida ishtirok etadi.
Eslatib o‘tamiz, Jak Shirak 26-sentabr kuni vafot etdi. U 86 yoshda edi.
Jak Shirak 1995—2007-yillarda, ikki muddat Fransiya prezidenti bo‘lgan. Bungacha ikki marta — 1974—1976 va 1986—1988-yillarda mamlakat bosh vaziri bo‘lgan. Ikkinchi bosh vazirlik muddatini Parij meri lavozimi bilan birga o‘tkazgan. U Fransiya poytaxtini 18 yil davomida boshqargan.
Mavzuga doir: Fransiya sobiq prezidenti Jak Shirak vafot etdi
Jak Shirak O‘zbekiston—Fransiya munosabatlarining mustahkamlanishiga ham katta hissa qo‘shgan. 1996-yil 24-aprel kuni Parijda YuNESKO tomonidan tashkil qilingan Amir Temurning 660 yilligiga bag‘ishlangan ko‘rgazmada shaxsan Jak Shirakning o‘zi ishtirok etgan hamda Amir Temurning 1402-yilda Fransiya qiroli Sharl Oltinchi nomiga yo‘llagan maktubini O‘zbekiston Birinchi Prezidenti Islom Karimovga sovg‘a qilgan.
Izoh (0)