O‘zbekiston Prezidenti Shavkat Mirziyoyev Fransiya prezidenti Emmanuel Makron va mamlakat xalqiga respublikaning sobiq Prezidenti Jak Shirak vafot etgani munosabati bilan ta’ziya yo‘lladi. Bu haqda Prezident matbuot xizmati xabar berdi.
Fransiyaning sobiq prezidenti Jak Shirak 26-sentabr kuni 86 yoshda vafot etdi.
Jak Shirak 1995—2007-yillarda, ikki muddat Fransiya prezidenti bo‘lgan. Bungacha ikki marta — 1974—1976 va 1986—1988-yillarda mamlakat bosh vaziri bo‘lgan. Ikkinchi bosh vazirlik muddatini Parij meri lavozimi bilan birga o‘tkazgan. U Fransiya poytaxtini 18 yil davomida boshqargan.
Shirak Ikkinchi jahon urushida yahudiylarning deportatsiya qilinishiga Fransiyaning daxldorligini birinchi bo‘lib tan olgani, shuningdek, AQShning Iroqqa bostirib kirishini qo‘llab-quvvatlashdan bosh tortgani bilan tanilgan. Bundan tashqari, Shirak davrida Fransiya prezidentining vakolat muddati yetti yildan besh yilga kamaytirilgan.
Jak Shirak O‘zbekiston—Fransiya munosabatlarining mustahkamlanishiga ham katta hissa qo‘shgan. 1996-yil 24-aprel kuni Parijda UNESCO tomonidan tashkil qilingan Amir Temurning 660 yilligiga bag‘ishlangan ko‘rgazmada shaxsan Jak Shirakning o‘zi ishtirok etgan hamda Amir Temurning 1402-yilda Fransiya qiroli Sharl Oltinchi nomiga yo‘llagan maktubini O‘zbekiston Birinchi Prezidenti Islom Karimovga sovg‘a qilgan.
Izoh (0)